Viral Video: అంతా చూస్తుండగా.. చిన్నారిని ఎలుగుబంటి ఎన్క్లోజర్లోకి నెట్టేసింది.. చివరికి ఏమైందో మీరే చూడండి..
ABN , First Publish Date - 2022-02-03T02:05:32+05:30 IST
ఉజ్బెకిస్తాన్ తాష్కెంట్ జూలో ఈ ఘటన చోటు చేసుకుంది. సందర్శకులతో ఆ జూ మొత్తం సందడి సందడిగా ఉంది. మరోవైపు చిన్నపిల్లలంతా జంతువులను ఆసక్తిగా చూస్తున్నారు. ఓ ఎలుగుబంటి ఎన్క్లోజర్ వద్ద జనం ..
పిల్లలు దేవుళ్లతో సమానం అంటారు. చిన్నారుల మనసు తెలుసుకుని వారి పట్ల ప్రేమతో వ్యవహరించాలి. కానీ ప్రస్తుత సమాజంలో పిల్లల పట్ల ప్రేమ చూపడం పక్కన పెడితే.. వారిని హింసిస్తూ పైశాసిక ఆనందం పొందే శాడిస్టులను ఇటీవల చాలా మందిని చూశాం. కన్న తల్లిదండ్రులు కూడా ఇలాంటి దారుణాలకు పాల్పడడం బాధాకరం. సోషల్ మీడియాలో ఇలాంటి వీడియోలు చాలా వైరల్ అవుతుంటాయి. ప్రస్తుతం నెట్టింట చక్కర్లు కొడుతున్న ఓ వీడియోలో చిన్నారిని స్వయానా కన్నతల్లే.. ఎలుగుబంటి ఎన్క్లోజర్లోకి నెట్టేసింది.
ఉజ్బెకిస్తాన్ తాష్కెంట్ జూలో ఈ ఘటన చోటు చేసుకుంది. సందర్శకులతో ఆ జూ మొత్తం సందడి సందడిగా ఉంది. మరోవైపు చిన్నపిల్లలంతా జంతువులను ఆసక్తిగా చూస్తున్నారు. ఓ ఎలుగుబంటి ఎన్క్లోజర్ వద్ద జనం గుమికూడి ఉన్నారు. ఈ క్రమంలో అంతా చూస్తుండగా ఓ మహిళ తన మూడేళ్ల కూతురిని ఎన్క్లోజర్లోకి పడేసింది. అప్పటి వరకు సైలెంట్గా ఉన్న ఎలుగుబంటి.. చిన్నారిని చూడగానే దాడి చేసేందుకు వేగంగా తన వద్దకు వెళ్లింది. అనూహ్య ఘటనతో పైనున్న జనం మొత్తం షాక్ అయ్యారు. వెంటనే అప్రమత్తమైన జూ సిబ్బంది అక్కడికి పరుగెత్తుకుంటూ వెళ్లి చిన్నారిని రక్షించారు. 16అడుగుల ఎత్తు నుంచి కింద పడడంతో పాపకు గాయాలయ్యాయి. దీంతో చికిత్స నిమిత్తం చిన్నారిని ఆస్పత్రికి తరలించారు. సీసీ ఫుటేజీ ఆధారంగా చిన్నారి తల్లిపై పోలీసులు కేసు నమోదు చేశారు.