Polavaram project : ‘పోలవరం’పై 8 నుంచి సంయుక్త సర్వే

తెలంగాణ, ఏపీ అధికారుల బృందం ఆధ్వర్యంలో

35 ఉప నదుల ప్రవాహంపై సర్వే, హద్దుల నిర్ధారణ

హైదరాబాద్‌, నవంబరు 3(ఆంధ్రజ్యోతి): పోలవరం బ్యాక్‌వాటర్‌ ముంపుపై ఈ నెల 8వ తేదీ నుంచి సంయుక్త సర్వే జరగనుంది. పోలవరం ప్రాజెక్టు అథారిటీ(పీపీఏ) ఆధ్వర్యంలో తెలంగాణ, ఆంధ్రప్రదేశ్‌కు చెందిన అధికారుల బృందం ఈ సర్వే చేపట్టనుంది. పోలవరం బ్యాక్‌వాటర్‌తో కిన్నెరసాని, ముర్రేడు వాగు ప్రవాహం సజావుగా ఉండదని, దీనివల్ల తమ రాష్ట్రంలోని 891 ఎకరాలు ముంపునకు గురవుతాయని ఇప్పటికే తెలంగాణ అభ్యంతరాలు వ్యక్తం చేసింది. గోదావరిలో కిన్నెరసాని కలిసే చోట నుంచి 18 కిలోమీటర్లు, ఆ తర్వాత కిన్నెరసానిలో ముర్రేడువాగు కలిసే ప్రదేశం నుంచి 6 కిలోమీటర్ల పరిధిలో ముంపు ప్రభావం ఉంటుందని ఎన్జీటీ వేసిన కమిటీ సైతం ప్రాథమికంగా అంచనా వేసింది. ఈ నేపథ్యంలో కిన్నెరసాని, ముర్రేడువాగుతోపాటు గోదావరిలో కలిసే మొత్తం 35 ఉపనదులపై పోలవరం బ్యాక్‌వాటర్‌ ప్రభావం ఏ మేరకు ఉంటుందో సర్వే చేసి, హద్దులు నిర్ధారించనున్నారు. ఏయే భూములు ముంపునకు గురవుతున్నాయో తేల్చి, 2013 భూసేకరణ చట్టం ప్రకారం వాటిని సేకరించనున్నారు. తెలంగాణ, ఏపీ సరిహద్దుల్లో ఏటపాక నుంచి ఈ సర్వే ప్రారంభం కానుంది.

ప్రధానంగా తెలంగాణ అభ్యంతరాలు

• పోలవరం ప్రాజెక్టు వద్ద 150 అడుగుల ద్వాకా నీటిని నిల్వ చేస్తే తెలంగాణలో 891 ఎకరాల సాగు భూమి నీట మునగనుంది. ఈ భూములను 2013 భూసేకరణ చట్టం అనుసరించి... పునరావాసం, పునర్నిర్మాణ ప్యాకేజీని అమలు చేసి, సేకరించాలి.

• 36 లక్షల క్యూసెక్కుల వరద అంచనాతో పోలవరం బ్యాక్‌వాటర్‌ ముంపుపై జరిగిన అధ్యయనంలో లోపాలున్నాయి. వాస్తవిక పరిస్థితుల ఆధారంగా సంయుక్త(తెలంగాణ, ఏపీ, సీడబ్ల్యూసీతో) సర్వే జరగాలి.

• 28 వేల మందిపై ముంపు ప్రభావం పడనున్న నేపథ్యంలో మళ్లీ ప్రజాభిప్రాయ సేకరణ చేపట్టాలి.

• ఆల్మట్టి ప్రాజెక్టు నిర్మాణ సమయంలో మహారాష్ట్ర అఽభ్యంతరాల మేరకు ప్రాబబుల్‌ మ్యాగ్జిమమ్‌ ఫ్లడ్‌(పీఎంఎ్‌ఫ)పై అధ్యయనం జరిగింది. ఈ మేరకు పోలవరం పీఎంఎఫ్‌ 50 లక్షల క్యూసెక్కులుగా అంచనా వేసి, అధ్యయనం చేయాలి.

• జూలైలో నమోదైన వరదకు, సీడబ్ల్యూసీ, ఏపీ సమర్పించిన నివేదికల్లో పేర్కొన్న వరద లెక్కల మధ్య తేడాలున్నాయి.

• 21.5 లక్షల క్యూసెక్కుల వరదకే భద్రాచలం పరిసర ప్రాంతాలు 5 రోజులు నీళ్లలో ఉన్నాయి. 36 లక్షల క్యూసెక్కుల వరద వస్తే పరిస్థితేంటి?

• పోలవరంలో పూడికపైనా అధ్యయనం చేపట్టి, స్పిల్‌వేలో మార్పులు చేయాలి.

• పోలవరం ప్రాజెక్టు ఆపరేషనల్‌ ప్రోటోకాల్‌లో మార్పులు చేపడితే.. తెలంగాణను భాగస్వామ్యం చేయాలి.

• బచావత్‌ ట్రైబ్యునల్‌లోని క్లాజ్‌-6 ప్రకారం ప్రాజెక్టు వ్యయంలోనే బ్యాక్‌వాటర్‌ ముంపు ప్రాంతాల రక్షణ చర్యలకు అయ్యే వ్యయం చూపించాలి.