Amaravathi: సీఎం జగన్‌కు ఎమ్మెల్యే అనగాని లేఖ

అమరావతి: మత్స్యకారుల ఇబ్బందులను వివరిస్తూ సీఎం జగన్‌ (CM Jagan)కు టీడీపీ ఎమ్మెల్యే అనగాని సత్యప్రసాద్ (Anagani Satya Prasad) లేఖ (Letter) రాశారు. ఈ సందర్భంగా ఆదివారం ఆయన ఇక్కడ మీడియాతో మాట్లాడుతూ మూడున్నరేళ్లుగా మత్స్యకారుల అభివృద్ధి పడకేసిందని, వేట నిషేధ సమయంలో ప్రభుత్వ ఆర్థిక సాయం చేయలేదని విమర్శించారు. ప్రమాదవశాత్తు మరణించిన మత్స్యకారులకు నాడు చంద్రన్న బీమా అమలు చేస్తే.. నేడు ఈ ప్రభుత్వం మొండిచేయి చూపిస్తోందన్నారు. టీడీపీ (TDP) అందించిన ఏ సంక్షేమ పథకాలు.. ఇప్పుడు మత్స్యకారులకు అందడంలేదని విమర్శించారు.

మత్స్య, మిత్ర గ్రూపులు, ఫిష్ మార్కెట్ల ఏర్పాటు చంద్రబాబు (Chandrababu)కే చెల్లిందని.. మత్స్యకారులకు పట్టాలిచ్చి ఇళ్లు నిర్మించిన ఘనత కూడా చంద్రబాబుదేనని ఎమ్మెల్యే అనగాని అన్నారు. టీడీపీ హయాంలో మడ అడవుల వల్ల వేల మందికి ఉపాధి కల్పించామని, ఇవాళ ధనార్జన కోసం జగన్ ప్రభుత్వం అడవులను ధ్వంసం చేస్తోందని విమర్శించారు. రెసిడెన్షియల్ స్కూళ్ల నిర్వీర్యంతో మత్స్యకారుల పిల్లల భవిత నాశనమవుతోందని, గత ప్రభుత్వంలోని అమలు చేసిన అన్ని పథకాలను పునరుద్ధరించి.. మత్స్యకారులను ఆర్థికంగా ఆదుకోవాలని ఎమ్మెల్యే అనగాని సత్యప్రసాద్ ఆ లేఖలో పేర్కొన్నారు.