Kollu Ravindra: చంద్రబాబు సీఎం కావాలని ఏపీ ప్రజలు కోరుకుంటున్నారు..

ఏలూరు జిల్లా: టీడీపీ అధినేత, మాజీ సీఎం చంద్రబాబు నాయుడు (Chandrababunaidu) బుధవారం ‘రాష్ట్రానికి ఇదేమి కర్మ’ కార్యక్రమం ప్రారంభించడానికి ఉమ్మడి గోదావరి జిల్లాలో పర్యటిస్తారని మాజీ మంత్రి కొల్లు రవీంద్ర (Kollu Ravindra) తెలిపారు. మంగళవారం ఏలూరు టీడీపీ కార్యాలయంలో ఆయన మీడియా సమావేశంలో మాట్లాడుతూ ఏపీ ప్రజలు చంద్రబాబు ముఖ్యమంత్రి కావాలని కోరుకుంటున్నారన్నారు. పశ్చిమగోదావరి జిల్లా, దెందులూరు నియోజకవర్గంలో చంద్రబాబు పర్యటనను అడ్డుకునేందుకు వైసీపీ నాయకులు (YCP Leaders) కుట్రలు పన్నుతున్నారని ఆరోపించారు. చంద్రబాబును అడ్డుకోవడం జగన్ (Jagan) కాదు కదా వాళ్ళ తాతతరం కూడా కాదని అన్నారు. జగన్ చేసిన అవినీతి బయటపడుతుందని భయపడుతున్నారన్నారు. తెలుగుదేశం పార్టీ నాయుకులు కన్నెర్ర చేస్తే వైసీపీ పార్టీ రాష్ట్రంలో కనుమరుగైపోతుందన్నారు. గతంలో జగన్మోహన్ రెడ్డి పాదయాత్ర చేసేటప్పుడు ఇదే పద్ధతిని తాము చేసి ఉంటే వైసీపీ అధికారంలోకి వచ్చేదా? అని కొల్లు రవీంద్ర ప్రశ్నించారు.