TANA: 'తానా' ఆధ్యర్యంలో రైతు కార్యక్రమం.. గడ్డి కోసే యంత్రాలు పంపిణీ
ABN , First Publish Date - 2022-12-22T11:53:43+05:30 IST
ఉత్తర అమెరికా తెలుగు సంఘం (TANA) తానా ఫౌండేషన్ ఆధ్వర్యంలో 'చైతన్య స్రవంతి' కార్యక్రమంలో భాగంగా బుధవారం (డిసెంబర్‌ 21న) కృష్ణా జిల్లాలోని హనుమాన్‌ జంక్షన్‌ పాలశీతలీకరణ కేంద్రంలో కృష్ణా మిల్క్‌ యూనియన్‌తో కలిసి నిర్వహించిన రైతు కార్యక్రమం విజయవంతమైంది.
ఎన్నారై డెస్క్: ఉత్తర అమెరికా తెలుగు సంఘం (TANA) తానా ఫౌండేషన్ ఆధ్వర్యంలో 'చైతన్య స్రవంతి' కార్యక్రమంలో భాగంగా బుధవారం (డిసెంబర్‌ 21న) కృష్ణా జిల్లాలోని హనుమాన్‌ జంక్షన్‌ పాలశీతలీకరణ కేంద్రంలో కృష్ణా మిల్క్‌ యూనియన్‌తో కలిసి నిర్వహించిన రైతు కార్యక్రమం విజయవంతమైంది. ఈ కార్యక్రమంలో తానా అధ్యక్షుడు అంజయ్య చౌదరితో పాటు చైతన్య స్రవంతి కో ఆర్డినేటర్‌ సునీల్‌ పంత్రా, కమ్యూనిటీ సర్వీసెస్‌ కో ఆర్డినేటర్‌ రాజా కసుకుర్తి, కృష్ణా మిల్స్‌ యూనియన్‌ చైర్మన్‌ చలసాని ఆంజనేయులు, ముఖ్య అతిథిగా రామ్‌ వెనిగళ్ళ ఇతర ప్రముఖులు పాల్గొన్నారు. ఈ సందర్భంగా రైతులకు గడ్డి కత్తిరించే యంత్రాలు, రక్షణ పరికరాలను అందజేశారు. నేత్ర వైద్యశిబిరాన్ని నిర్వహించి కంటి పరీక్షలను నిర్వహించారు. రైతు నెక్కంటి సుబ్బారావును సన్మానించారు.
ఈ సందర్భంగా తానా అధ్యక్షుడు అంజయ్య చౌదరి మాట్లాడుతూ.. తామంతా రైతు బిడ్డలమేనని, తమ తల్లితండ్రులు వ్యవసాయం చేస్తున్నప్పుడు పడిన కష్టాలు తమకు ఇంకా గుర్తుందని తెలిపారు. రైతు కష్టంతో తామంతా చదివి ఇప్పుడు అమెరికాలో ఉన్నప్పటికీ రైతులకు ఏదైనా మేలు చేయాలన్న ఉద్దేశంతో తానా తరపున రైతుకోసం పలు కార్యక్రమాలను చేపట్టామని చెప్పారు. జిల్లాలో పాడిపరిశ్రమను నిర్లక్ష్యం చేస్తున్నారని, ప్రస్తుతం గడ్డిని పెంచేవాళ్ళ సంఖ్య బాగా తగ్గిపోవడం బాధగా ఉందన్నారు. రైతులకు గడ్డిని కోసే యంత్రాలను అందించడం ద్వారా వారి కష్టాలను తగ్గించే ప్రయత్నాన్ని తానా తరపున చేస్తున్నామని చెప్పారు. పాడిపరిశ్రమ అభివృద్ధికి రైతులంతా ముందుకు వచ్చి సహకరించాలని కోరారు. పాడిపరిశ్రమ అభివృద్ధికి కృష్ణా మిల్క్‌ యూనియన్‌ బాగా పనిచేస్తోందని ప్రశంసించారు.
తానా కమ్యూనిటీ సర్వీసెస్‌ కో ఆర్డినేటర్‌ రాజా కసుకుర్తి మాట్లాడుతూ.. తామంతా రైతు పడిన కష్టాలను స్వయంగా చూసినవారమని గుర్తు చేశారు. నాన్న వ్యవసాయం చేసినప్పుడు పడ్డ కష్టం, అమ్మ పాలు అమ్మి చదివించిన సంగతిని ఈ సందర్భంగా ఆయన గుర్తు చేసుకున్నారు. అందుకే జిల్లాలో పాడిపరిశ్రమ అభివృద్ధికి, రైతు బాగుకోసం తామంతా కృషి చేస్తున్నామని తెలిపారు. మునుముందు కూడా తానా తరపున రైతు సహాయ కార్యక్రమాలను నిర్వహిస్తున్నామన్నారు.
కృష్ణా జిల్లా మిల్స్‌ యూనియన్‌ చైర్మన్‌ చలసాని ఆంజనేయులు మాట్లాడుతూ, అమెరికాలో స్థిరపడినా రైతు కుటుంబానికి చెందిన వీళ్ళంతా ఇక్కడకు వచ్చి రైతులకు సహాయం అందించడం ఎంతో ప్రశంసనీయమైన విషయమని చెప్పారు. వారికి కూడా మనవంతు సహకారాన్ని అందించాలని కోరారు.
ఈ కార్యక్రమంలో తానా కార్యదర్శి సతీష్‌ వేమూరి, ఫౌండేషన్ కార్యదర్శి శశికాంత్‌ వల్లేపల్లి, పురుషోత్తం చౌదరి, శశాంక్‌ యార్లగడ్డ, రఘు ఎదులపల్లి, వెంకట రమణ గన్నె, ఠాగూర్‌ మలినేని, శ్రీనివాస్‌ కూకట్ల, జోగేశ్వరరావు పెద్దిబోయిన, ప్రశాంత్‌ కాట్రగడ్డ, విష్ణు దోనెపూడి తదితరులు పాల్గొన్నారు.
