RRR: రాజమౌళికి మరో అరుదైన పురస్కారం!

‘ఆర్‌ఆర్‌ఆర్‌’(RRR)కు మరో అవార్డు దక్కింది. హాలీవుడ్‌లో ప్రతిష్ఠాత్మకంగా భావించే ‘ది న్యూయార్క్‌ ఫిల్మ్‌ క్రిటిక్స్‌ సర్కిల్‌’ (New York Film Critics Circle Award)అవార్డు ఈ చిత్రాన్ని వరించింది. వార్తా పత్రికలు, మ్యాగజైన్స్‌, ఆన్‌లైన్‌ మీడియాకు సంబంధించిన ప్రముఖులు ఒక టీమ్‌గా ఏర్పడి 1935 నుంచి సినీ పరిశ్రమలో ఉత్తమ ప్రతిభ కనబరిచిన వారికి ఈ పురస్కారాన్ని అందజేస్తున్నారు. తాజాగా ఈ ప్రతిష్ఠాత్మక అవార్డు రాజమౌళిని వరించింది. అమెరికాలో నిర్వహించిన అవార్డుల ప్రదానోత్సవంలో ‘ఆర్‌ఆర్‌ఆర్‌’ చిత్రానికి గానూ ఉత్తమ దర్శకుడిగా రాజమౌళి (Rajamouli) ఈ అవార్డు సొంతం చేసుకున్నారు. రామ్‌చరణ్‌ -జూ.ఎన్టీఆర్‌ కీలక పాత్రధారులుగా రాజమౌళి దర్శకత్వం వహించిన ఈ చిత్రం రూ.400 కోట్ల బడ్జెట్‌తో తెరకెక్కి సుమారు రూ.1200 కోట్లు వసూళ్లు రాబట్టింది. ప్రపంచ వ్యాప్తంగా అలరించిన ఈ సినిమా ఇప్పటికే శాటర్న్‌, సన్‌సెట్‌ సర్కిల్‌ వంటి పలు అంతర్జాతీయ అవార్డులు దక్కించుకున్న సంగతి తెలిసిందే!   ఆస్కార్‌ బరిలోనూ దిగింది.