Rajinikanth: పాకిస్థాన్‌లో రజనీకాంత్.. చూస్తే షాకవుతారు

భారత్ (India) అంటే పాకిస్థాన్‌కు, పాకిస్థాన్ (Pakistan) అంటే భారత్‌కు అస్సలు పడదనే విషయం తెలియంది కాదు. అలాంటి పాకిస్థాన్‌కి మన సూపర్ స్టార్ రజనీకాంత్ (Superstar Rajinikanth) ఎందుకు వెళ్లారని అనుకుంటున్నారా? నిజంగా రజనీకాంత్ పాకిస్థాన్ వెళితే.. అక్కడి వారు కామ్‌గా ఉంటారా? రజనీకాంత్‌ని బంధించి.. భారత్‌పై ఒత్తిడి తెచ్చి.. వారి డిమాండ్లు నెరవేర్చుకోవాలని చూస్తారు. రజనీ కోసం భారత్ తలొగ్గాల్సిన పరిస్థితి కూడా ఏర్పడుతుంది. మరి అలాంటి పరిస్థితులు ఉన్న పాకిస్థాన్‌కి రజనీకాంత్ ఎందుకు వెళతారు.. కదా? మరి పాకిస్థాన్ వీధుల్లో చక్కర్లు కొడుతున్న ఈ రజనీకాంత్ ఎవరు? అని అనుకుంటున్నారా.. అయితే అసలు విషయంలోకి వచ్చేద్దాం..

ఈ ప్రపంచంలో మనుషులను పోలిన మనుషులు 7గురు ఉంటారని నానుడి. ఇది నిజమో కాదో.. తెలియదు కానీ.. సేమ్ టు సేమ్ మన తలైవాని పోలిన మనిషి పాకిస్థాన్‌లో ఉన్నారు. అతని పేరు రెహ్మాత్ గాస్‌ఖోరి (Rehmat Gashkori). రజనీకాంత్‌ను పోలి ఉండటమే కాదు.. రెహ్మాత్ స్టయిల్, వేషధారణ కూడా సేమ్ టు సేమ్ అలాగే ఉండటంతో.. పాకిస్థాన్‌లో అందరూ ఆయనతో సెల్ఫీలు దిగేందుకు ఎగబడుతుండటం విశేషం. నిజంగానే రజనీకాంత్ పాకిస్థాన్ వచ్చాడని అనుకుంటూ.. ఆయన ఎక్కడికి వెళితే అక్కడ.. సూపర్ స్టార్ అంటూ జనం పోగవుతుంటారని, వారందరికీ తను రజనీకాదని తెలిసిన తర్వాత షాకవుతుంటారని స్వయంగా రెహ్మాత్ గాస్‌ఖోరినే తెలుపుతున్నారు. (Rajinikanth's lookalike from Pakistan)

అసలెవరీ రెహ్మాత్ గాస్‌ఖోరి..

అచ్చం రజనీకాంత్‌లా ఉన్న రెహ్మాత్ గాస్‌ఖోరి.. పాకిస్తాన్‌ గవర్నమెంట్ ఉద్యోగి. అక్కడి కమీషనర్ కార్యాలయంలో ఉద్యోగం చేసి.. ప్రస్తుతం రిటైర్ అయ్యారు. ప్రస్తుతం ఆయన వయసు 62 ఏళ్లు. పదవీ విరమణ అనంతరం రెహ్మాత్ సోషల్ మీడియాలో యాక్టివ్‌గా ఉంటూ.. తనకున్న రజనీ ఫాలోయింగ్‌ని పెంచుకునే ప్రయత్నం చేస్తున్నారు. రజనీకాంత్ (Rajinikanth) స్టైల్‌తో ఉన్న ఫొటోలని తరచుగా సోషల్ మీడియాలో పోస్ట్ చేస్తూ.. క్రేజ్ సంపాదించుకుంటున్నాడు. ఆయనని ఇప్పటికే పలు ఛానళ్లు ఇంటర్వ్యూలు చేయడం విశేషం. రజనీకాంత్ రూపం గురించి రెహ్మాత్ మాట్లాడుతూ.. ‘‘అవును.. నేను పాకిస్థాన్ సూపర్ స్టార్‌ని. నిజంగా ఒక గొప్ప స్టార్‌ పోలికలతో నేను ఉండటం చాలా ఆనందాన్నిస్తుంటుంది. ఇది నాకు దేవుడిచ్చిన వరంగా భావిస్తున్నాను. నా ఫొటోలను పాకిస్థాన్ ప్రజలే కాకుండా.. భారత్, బంగ్లాదేశ్, సౌదీకి చెందిన వాళ్లు కూడా షేర్ చేస్తుండటం చూస్తుంటే.. నిజంగా ఆ సూపర్ స్టార్‌కి ఇంత ఫాలోయింగ్ ఉందా? అని అనిపిస్తుంది. ఇది తలచుకున్నప్పుడల్లా.. చాలా గర్వంగా అనిపిస్తుంది..’’ అని తెలిపాడు. ప్రస్తుతం రెహ్మాత్ గాస్‌ఖోరి ఫొటోలు సోషల్ మీడియాలో వైరల్ అవుతున్నాయి. మరి.. ఈ ఫొటోలు ఒరిజినల్ రజనీకాంత్ వరకు చేరిన తర్వాత.. ఆయన నుంచి ఎటువంటి రియాక్షన్ వస్తుందో చూడాలి.