moinabad farm house: ఎమ్మెల్యేలకు ఎర కేసులో మరిన్ని అరెస్ట్‌లు..!

హైదరాబాద్: ఎమ్మెల్యేలకు ఎర కేసులో మరిన్ని అరెస్ట్‌లు జరిగే అవకాశం ఉంది. ఏపీ, హర్యానా, కేరళ (Haryana Kerala), కర్ణాటకతో పాటు హైదరాబాద్‌లో సిట్‌ తనిఖీలు చేస్తున్నారు. 7 బృందాలుగా సిట్ అధికారులు సోదాలు నిర్వహిస్తున్నారు. హర్యానా, కర్ణాటకలోని రామచంద్రభారతి నివాసాల్లో సోదాలు చేస్తున్నారు. అలాగే తిరుపతి (Tirupati)లోని సింహయాజీ స్వామీజీ ఆశ్రమంలో సిట్ అధికారులు తనిఖీలు చేస్తున్నారు. కేరళలో ఓ వైద్యుడి ఇంట్లో సిట్ బృందం తనిఖీలు నిర్వహిస్తోంది. రామచంద్రభారతికి కొచ్చిలో ఉండే వైద్యుడు మధ్యవర్తిగా వ్యవహరిస్తున్నట్లు గుర్తించారు. తనిఖీల్లో పలు కీలక పత్రాలను సిట్ బృందం స్వాధీనం చేసుకున్నారు. సింహయాజీ తిరుపతి నుంచి హైదరాబాద్ రావడానికి ఓ జాతీయ పార్టీ నేత బంధువు ఫ్లైట్‌ టికెట్ బుక్ చేసినట్లు సిట్ గుర్తించారు.

నందు ఇల్లు, హోటల్‌లో సోదాలు

ఎమ్మెల్యేలతో బేరసారాల కేసులో ఏ-2గా ఉన్న నందకుమార్‌ ఇల్లు, హోటల్‌తోపాటు మరికొన్ని ప్రాంతాల్లో సిట్‌ బృందం శనివారం సోదాలు నిర్వహించింది. నిందితులను పోలీసులు అరెస్టు చేసే ముందు కూడా వారంతా షేక్‌పేట్‌లోని నందు ఇంట్లో ఉన్న విషయం తెలిసిందే. ఈ నేపథ్యంలో.. అక్కడ ఆధారాల కోసం తనిఖీలు జరిపి, సీసీటీవీ ఫుటేజీ వంటి పలు ఆధారాలను సేకరించింది. నందు నిర్వహిస్తున్న ఫిల్మ్‌నగర్‌లోని దక్కన్‌ హోటల్‌లోనూ సిట్‌ బృందాలు సోదాలు నిర్వహించాయి.

నలుగురు ఎమ్మెల్యేలకు బెదిరింపులు

ఈ కేసులో ఫిర్యాది అయిన ఎమ్మెల్యే పైలెట్‌ రోహిత్‌ రెడ్డి (Pilot Rohit Reddy)తోపాటు.. సహ ఎమ్మెల్యేలు గువ్వల బాలరాజు, హర్షవర్ధన్‌ రెడ్డి, రేగా కాంతారావుకు కొద్ది రోజులుగా బెదిరింపు ఫోన్‌కాల్స్‌ వస్తున్నాయి. వారంతా ఈ విషయాన్ని ప్రభుత్వం దృష్టికి తీసుకెళ్లారు. పోలీసులకు ఫిర్యాదు చేసేందుకు సిద్ధమవుతున్నారు. దీంతో పోలీసులు ఎమ్మెల్యేల నివాసాలు, క్యాంపు కార్యాలయాల వద్ద నిఘా పెంచారు. సోషల్‌ మీడియాలోనూ బెదిరింపు పోస్టింగ్‌లపై దృష్టి సారించారు.