Congress President: ఖర్గేతో కోమటిరెడ్డి భేటీ

ఢిల్లీ: కాంగ్రెస్ అధ్యక్షుడు మల్లికార్జున్ ఖర్గే(Mallikarjun Kharge)ను ఎంపీ కోమటిరెడ్డి వెంకట్ రెడ్డి(MP Komati Reddy Venkat Reddy) కలిశారు. ఏఐసీసీ నూతన అధ్యక్షుడిగా ఎన్నికైనందుకు ఖర్గేకు వెంకట్ రెడ్డి అభినందనలు తెలిపారు. ఈ సందర్భంగా తెలంగాణ రాజకీయ పరిస్థితులు, నేతలు పార్టీ వీడటం, మర్రి శశిధర్ రెడ్డి, వెంకట్ రాంరెడ్డి సహా పలువురు సీనియర్ నేతల రాజీనామాల అంశాన్ని ఖర్గేకు కోమటిరెడ్డి వివరించారు. అరగంట పాటు వివిధ అంశాలపై ఖర్గేతో కోమటిరెడ్డి వెంకట్ రెడ్డి చర్చించారు.

ఇటీవల మునుగోడు ఉపఎన్నికల సందర్భంగా కోమటిరెడ్డి వెంకట్‌రెడ్డి చేసిన వ్యాఖ్యలు తెలంగాణ కాంగ్రెస్‌లో తీవ్ర దుమారం రేపాయి. మునుగోడు బైపోల్‌లో బీజేపీ అభ్యర్థి రాజగోపాల్‌రెడ్డే గెలుస్తాడని వ్యాఖ్యానించారు. ఈ వ్యాఖ్యలపై తెలంగాణ కాంగ్రెస్ తీవ్రంగా మండిపడింది.