Revanth Reddy: ఎనిమిదేళ్ల టీఆర్ఎస్ పాలనలో నిరుద్యోగులకు తీవ్ర నిరాశ..

హైదరాబాద్: సీఎం కేసీఆర్‌ (CM KCR)కు టీపీసీసీ అధ్యక్షుడు రేవంత్ రెడ్డి (Revanth Reddy) బహిరంగ లేఖ (Letter) రాశారు. ఎస్ఐ, కానిస్టేబుల్ అభ్యర్థుల సమస్యలపై ఆయన లేఖ రాశారు. 8 ఏళ్ల టీఆర్ఎస్ (TRS) పాలనలో నిరుద్యోగులకు తీవ్ర నిరాశ మిగిల్చారని విమర్శించారు. ఎస్ఐ, కానిస్టేబుల్ అభ్యర్థులకు మార్కులు కలపాలని.. హైకోర్టు (High Court) తీర్పు ఇచ్చినా పట్టించుకోవడం లేదని ఆరోపించారు. అభ్యర్థులు తమ ఆవేదనను ట్విట్టర్‌లో మంత్రి కేటీఆర్ (KTR), డీజీపీ (DGP)కి విన్నవించుకున్నా సమాధానం రాలేదన్నారు. సంబంధిత శాఖను చూస్తే అసలు హోంమంత్రి ఉన్నారో లేదో తెలియదన్నారు. ఇవేమీ పట్టనట్టు సీఎం బీఆర్ఎస్ (BRS) అంటూ దేశమంతా తిరుగుతున్నారని, పాలన ఈ విధంగా ఉంటే ఉద్యోగార్థుల సమస్యను తీర్చేదెవరని ప్రశ్నిస్తూ లేఖ రాశారు. హైకోర్టు ఆదేశించిన ప్రిలిమినరీ పరీక్షలోని 7 ప్రశ్నలను తొలగించి.. అభ్యర్ధులకు న్యాయం చేయాలని కోరారు. ప్రభుత్వం హైకోర్టు తీర్పును అమలు చేస్తే దాదాపు 50-60 వేల మంది అభ్యర్ధులకు ఫిజికల్ టెస్టులకు హాజరయ్యే అవకాశం లభిస్తుందని రేవంత్ రెడ్డి ఆ లేఖలో పేర్కొన్నారు.