Accident : అనంతపురం జిల్లా తాడిపత్రిలో ఘోర ప్రమాదం.. ఫ్రెండ్స్‌తో ఎంజాయ్ చేసి తిరిగొస్తుండగా..!

ఓ వ్యక్తి కారు కొన్నాడు.. ఆ ఆనందంలో ఫ్రెండ్స్‌కు పార్టీ ఇచ్చాడు..! ఫ్రెండ్స్‌తో కలిసి ఎంజాయ్ చేశాడు..! కాసేపు ఆగి ఉంటే అన్నీ సవ్యంగానే జరిగేవి.! ఇంతలోనే ఊహించని ప్రమాదం.. ఆ కారే బలితీసుకుంది!. కారులో బయలుదేరిన ఫ్రెండ్స్ మరణంలో కూడా తోడుగా వెళ్లారు!. హైవేపై వెళ్తుండగా.. ఒక్కసారిగా అదుపుతప్పి చెట్టును ఢీకొన్నది. కారు కొన్న ఆ ఆనందం ఎన్నో గంటలు ఆగలేదు..! కారు యజమానితో పాటు మరో ఇద్దరు దుర్మరణం చెందగా.. మరొకరు కొనప్రాణాలతో కొట్టుమిట్టాడుతున్నారు!

ఏం జరిగిందంటే..?

అనంతపురం జిల్లాలో ఘోర రోడ్డు ప్రమాదం జరిగింది. జిల్లాలోని తాడిపత్రి మండలం, రావి వెంకటం పల్లి గ్రామం వద్ద శనివారం ఉదయం ఈ ప్రమాదం చోటుచేసుకుంది. తాడిపత్రి హైవేపై (NH 544 D) అదుపుతప్పిన కారు చెట్టును ఢీకొన్నది. కారులో ప్రయాణిస్తున్న నలుగురిలో ముగ్గురు అక్కడికక్కడే మృతిచెందారు. సెకండ్స్‌లో శుక్రవారం నాడు కారు తీసుకున్న మోహన్ రెడ్డి.. ఆ ఆనందంలో ఫ్రెండ్స్‌కు పార్టీ ఇచ్చాడు. ఫ్రెండ్స్ అంతా ఫుల్ తినేసి ఎంజాయ్ చేసిన ఆ ఆనంద సమయాలను గుర్తు చేసుకుంటూ తిరిగి ప్రయాణం చేశారు.. తిరిగి వస్తుండగా కారు ప్రమాదానికి గురైంది. ఈ ఘటనలో కారు యజమాని మోహన్ రెడ్డితో పాటు ఇద్దరు వ్యక్తులు మృతిచెందగా.. ఒకరికి తీవ్ర గాయాలయ్యాయి. క్షతగాత్రుడ్ని స్థానికంగా ఉన్న ఆసుపత్రికి తరలించి వైద్యం అందిస్తున్నారు. కారు కొన్నామనే ఆనందంలో మునిగితేలిన ఆ కుటుంబంలో పెనువిషాదం నెలకొంది. అయితే.. మద్యం మత్తు, అతివేగమే ఈ ప్రమాదానికి కారణమాని పోలీసులు ప్రాథమిక అంచనా వేశారు. ఘటనపై కేసు నమోదు చేసిన పోలీసులు దర్యాప్తు చేస్తున్నారు.