చంద్రబాబు అరెస్ట్ తీరు సరికాదు : బీజేపీ నేత భానుప్రకాష్ రెడ్డి

ఢిల్లీ : మాజీ సీఎం నారా చంద్రబాబు నాయుడు అరెస్ట్ వ్యవహారంలో బీజేపీ అధ్యక్షురాలు పురందేశ్వరితో పాటు తాము స్పందించడం జరిగిందని ఏపీ బీజేపీ నేత భానుప్రకాష్ రెడ్డి తెలిపారు. చంద్రబాబు అరెస్ట్ తీరు సరికాదన్నారు. ఆయన ఆరోగ్యం పట్ల కుటుంబ సభ్యులు ఆందోళన వ్యక్తం చేస్తున్నారన్నారు. అధికారులపై నమ్మకం సన్నగిల్లిందన్నారు. ఎయిమ్స్ వైద్యులతో ఆరోగ్యం చెక్ చేయించాలన్నారు. ఏపీలో దురదృష్టకరమైన పరిస్థితులు ఉన్నాయని భానుప్రకాష్ రెడ్డి అన్నారు.

‘‘రాష్ట్రంలో దిష్టిబొమ్మలు కాల్చినా కూడా కేసులు పెడుతున్నారన్నారు. ఏపీలో అరాచకం రాజ్యమేలుతోందన్నారు. ‘‘ఈ పాలన ఎక్కువ రోజులు రాష్ట్రంలో కొనసాగదు. ఏపీ ప్రభుత్వం కౌంట్ డౌన్ మొదలైంది. ఆంధ్రప్రదేశ్‌లో అరాచకం రాజ్యం ఏలుతుంది. దిష్టిబొమ్మలు తగులబెడితే బీజేపీ నేతలపై 307 సెక్షన్ కింద కేసులు పెడుతున్నారు. ఏపీ ప్రభుత్వానికి వ్యతిరేకంగా ఏపీ ప్రజలు తీర్పు ఇవ్వబోతున్నారు. ఏపీలో ప్రతిపక్ష నేతపై అక్రమ కేసులు పెట్టి ఆయనను నిబంధనలకు వ్యతిరేకంగా అరెస్ట్ చేశారు’’ అని భానుప్రకాష్ రెడ్డి పేర్కొన్నారు.