Nandyala Dist.: శ్రీశైలంలో అగ్నిప్రమాదం

నంద్యాల జిల్లా: శ్రీశైలంలో అగ్నిప్రమాదం (Fire in Srisailam) చోటు చేసుకుంది. అర్ధరాత్రి ఒంటిగంట సమయంలో లలితాంబికా షాపింగ్ కాంప్లెక్స్‌ (Lalithambika Shopping Complex)లో మంటలు చెలరేగాయి. ఎల్ బ్లాక్‌ (L Block)లో మంటలు అంటుకోవడంతో 12 దుకాణాలు పూర్తిగా దగ్ధంకాగా మరికొన్ని షాపులు కొంతమేర దెబ్బతిన్నాయి. ఎల్ బ్లాక్‌ దుకాణాల్లో షార్ట్‌సర్క్యూట్‌ (Short Circuit)తో మంటలు చెలరేగి దుకాణాలు దగ్ధమయినట్లు తెలియవచ్చింది. సమాచారం అందుకున్న పోలీసులు, అగ్నిమాపక సిబ్బంది సంఘటన ప్రదేశానికి చేరుకుని భారీగా ఎగసిపడుతున్న మంటలను అదుపులోకి తీసుకువచ్చారు. మంటలు చెలరేగిన దుకాణాల వద్దకు చేరుకున్న ఈవో లవన్న ఎక్కడికక్కడ చర్యలు తీసుకుంటున్నారు. దుకాణాల దగ్ధంతో సుమారు రూ.2 కోట్ల మేర ఆస్తి నష్టం జరిగినట్లు ప్రాథమిక సమాచారం. పూర్తి సమాచారం తెలియాల్సి ఉంది. పోలీసులు కేసు నమోదు చేసి దర్యాప్తు చేపట్టారు.