Gudivada Amarnath : హైదరాబాద్‌లో పవన్ ఎంజాయ్ స్టార్.. ఆంధ్రలో గంజాయి స్టార్.. గుడివాడ అమర్‌నాథ్ సంచలనం
ABN , First Publish Date - 2023-07-10T12:27:04+05:30 IST
జనసేన అధినేత పవన్ కళ్యాణ్ హైదరాబాద్‌లో ఎంజాయ్ స్టార్ అని.. ఆంధ్రలో గంజాయి స్టార్ అని మంత్రి గుడివాడ అమర్‌నాథ్ విమర్శించారు. పొలిటికల్ సైడ్ హీరో, తిరుగుబోతు సంసారం గురించి మాట్లాడితే ఎలా ఉంటుందో, పవన్ కళ్యాణ్ రాజకీయాల గురించి మాట్లాడితే అలాగే ఉంటుందన్నారు.
విశాఖపట్నం : జనసేన అధినేత పవన్ కళ్యాణ్ హైదరాబాద్‌లో ఎంజాయ్ స్టార్ అని.. ఆంధ్రలో గంజాయి స్టార్ అని మంత్రి గుడివాడ అమర్‌నాథ్ విమర్శించారు. పొలిటికల్ సైడ్ హీరో, తిరుగుబోతు సంసారం గురించి మాట్లాడితే ఎలా ఉంటుందో, పవన్ కళ్యాణ్ రాజకీయాల గురించి మాట్లాడితే అలాగే ఉంటుందన్నారు. పవన్ నిరాశ, ఆవేదన బాధతో ఉన్మాదిలా మాట్లాడుతున్నాడని విమర్శించారు. ఒక రాజకీయ పార్టీ అధ్యక్షుడు మాట్లాడాల్సిన మాటలేనా? అవి అని గుడివాడ అమర్‌నాథ్ ఆగ్రహం వ్యక్తం చేశారు.
పవన్ నిన్న చేసిన వ్యాఖ్యలను, వ్యవహరించిన తీరును తీవ్రంగా ఖండిస్తున్నామని పేర్కొన్నారు. ఆరిపోయే దీపానికి వెలుగు ఎక్కువ అంటారని పవన్‌ను ఎద్దేవా చేశారు. వలంటీర్లు ఎక్కడ అమ్మాయిలు ఉన్నారో ఆ సమాచారం ఇస్తున్నారని విమర్శలు చేస్తున్నారన్నారు. ఏపీ వాలంటీర్ వ్యవస్థను కించ పరిచేలా పవన్ వ్యాఖ్యలు చేశారన్నారు. ఈ రాష్ట్రంలో పవన్‌ను చూస్తేనే ఎక్కడ కనిపిస్తే తాళి కట్టేస్తారేమోనని ఆడపిల్లలు భయపడుతున్నారని గుడివాడ అమర్‌నాథ్ పేర్కొన్నారు.
పవన్ కళ్యాణ్ జనసేనాని కాదని, చంద్రబాబు సేనాని అని ఎద్దేవా చేశారు. జనసేనను టీడీపీలో కలిపి వేయచ్చు కదా అని ప్రశ్నించారు. వేర్వేరు బ్యానర్‌లో ఉంటేనే డబ్బులు వస్తాయని కలపడం లేదన్నారు. వెబ్ సిరీస్‌లా వారాహి యాత్ర ఉందన్నారు. పవన్ కల్యాణ్ వ్యాఖ్యలను వైసీపీ ఖండిస్తోందన్నారు. పవన్, చంద్రబాబు, లోకేష్ కలసి తిరగవచ్చు కదా అని ప్రశ్నించారు. వారు అధికారంలోకి వస్తే పథకాలు తీసేస్తామని, వలంటిర్ వ్యవస్థను రద్దు చేస్తామని చెపొచ్చు కదా అని గుడివాడ అమర్‌నాథ్ ప్రశ్నించారు.
