Amaravati: చంద్రబాబు అధ్యక్షతన నేడు టీడీపీ పార్లమెంటరీ పార్టీ భేటీ

అమరావతి: తెలుగుదేశం జాతీయ అధ్యక్షుడు చంద్రబాబు నాయుడు అధ్యక్షతన శుక్రవారం టీడీపీ పార్లమెంటరీ పార్టీ సమావేశం జరగనుంది. ఉండవల్లిలోని చంద్రబాబు నివాసంలో ఈ బేటీ జరుగుతుంది. డిసెంబర్ 4వ తేదీ నుంచి ప్రారంభం కానున్న పార్లమెంట్ సమావేశాల్లో అనుసరించాల్సిన వ్యూహంపై చర్చించనున్నారు. అలాగే వైకాపా ప్రభుత్వ ప్రజా వ్యతిరేక విధానాలను పార్లమెంట్ వేదికగా ఎండగట్టే విషయమై చంద్రబాబు ఎంపీలకు దిశానిర్దేశం చేయనున్నారు.

కాగా పార్లమెంటు శీతాకాల సమావేశాలు ఈ నెల 4వ తేదీ నుంచి 22వ తేదీ వరకు జరగనున్నాయి. 2న అఖిల పక్ష సమావేశం నిర్వహించనున్నట్లు పార్లమెంటరీ వ్యవహారాల మంత్రి ప్రహ్లాద్‌ జోషి వెల్లడించారు. ముందుగా 3వ తేదీన అఖిలపక్ష సమావేశం నిర్వహించాలని భావించగా.. ఆ రోజు 5 రాష్ట్రాల ఎన్నికల ఓట్ల లెక్కింపు ఉండడంతో ఈ నిర్ణయం తీసుకున్నారు. ఈ శీతాకాల సమావేశాల్లో సీఈసీ, ఎలక్షన్‌ కమిషనర్ల నియామకాల బిల్లుతో పాటు ఐపీసీ, సీఆర్‌పీసీ, ఎవిడెన్స్‌ యాక్ట్‌ల స్థానంలో నిర్దేశించిన మూడు బిల్లులను ప్రవేశపెట్టనున్నారు.