Srisailam: శివనామ స్మరణతో మారుమ్రోగుతున్న శ్రీశైలం మహాక్షేత్రం

నంద్యాల: ఆంధ్రప్రదేశ్ (Andhra Pradesh) రాష్టంలోని నంద్యాల జిల్లా శ్రీశైలం (Srisailam) ఆలయ ప్రధాన వీధుల్లో కన్నులపండుగగా ప్రభోత్సవం జరుగుతోంది. శివనామ స్మరణతో శ్రీశైలం మహాక్షేత్రం మారుమ్రోగుతోంది. మహాశివరాత్రి పర్వదినం సందర్భంగా ఆలయంలో స్వామిఅమ్మవార్లకు నంది వాహనసేవ జరుగుతోంది. భక్తుల రద్దీ కారణంగా శ్రీశైలం ఆలయ పురవీధుల్లో గ్రామోత్సవం రద్దు చేసినట్లు అధికారులు తెలిపారు. నంది వాహనంపై ఆలయ ప్రాంగణంలో స్వామిఅమ్మవార్లు విహరిస్తున్నారు. మరికాసేపట్లో స్వామివారి గర్భాలయ ఆలయంపై పాగాలంకరణ చేయనున్నారు. పాగాలంకరణ దర్శనం కోసం వేలాదిమంది భక్తులు వేచిచూస్తున్నారు.

ఆది మధ్యాంత లయుడైన పరమ శివుడు లింగాకారంలో ఉద్భవించడమే మహా శివరాత్రి (Maha shivratri) ఈ సందర్భంగా ద్వాదశ జ్యోతిర్లంగ క్షేత్రాల్లో ఒకటైన శ్రీశైలం (Srisailam) కైలాసంగా విరాజిల్లుతుంది. శనివారం లక్షలాది భక్తుల ఓంకార నాదాల మధ్య స్వామివారికి పాగాలంకరణ, ఆది దంపతుల కల్యాణం కన్నుల పండువగా జరిగింది. స్వామి, అమ్మవార్ల ప్రభోత్సవం, నంది వాహన సేవ నయనానందభరితంగా సాగింది.

సాయంత్రం క్షేత్ర ప్రధాన వీధుల్లో అశేష భక్తజనం నడుమ ప్రభోత్సవం నిర్వహించారు. శివరాత్రి తర్వాతి రోజు జరిగే రథోత్సవ నిర్వహణకు వీలుగా ముందస్తుగా ప్రభోత్సవం జరుపుతారు. శనివారం సాయంత్రం జరిగిన ప్రభోత్సవంలో స్వామి, అమ్మవార్ల ఉత్సవమూర్తులను ఊరేగించారు. ఆలయ వీధుల్లో ప్రభోత్సవం ఘనంగా జరిగింది.

భ్రమరాంబ సమేతుడై మల్లికార్జునుడు నంది వాహనంపై ఊరేగారు. బ్రహ్మోత్సవాల్లో 8వ రోజు స్వామివారికి నంది వాహన సేవ నిర్వహించడం ఆనవాయితీ. ఉభయ దేవాలయ ప్రాంగణంలోని అక్కమహాదేవి అలంకార మండపంలో ఈ సేవ నిర్వహించారు. అనంతరం ఆలయంలో నందివాహనంపై కొలువైన ఆది దంపతులను ఊరేగించారు. వివిధ జానపద కళాకారుల నృత్య ప్రదర్శనలు భక్తులను ఆలరించాయి.

ఈ వార్తలు కూడా చదవండి

*******************************************

శివనామ స్మరణతో మారుమ్రోగుతున్న శ్రీశైలం మహాక్షేత్రం

***************************************************

సైకో పాలనపై ప్రజలు విసుగు చెందారు : టీడీపీ

******************************************