AP News: రైలులో మద్యం తరలిస్తున్న ముఠా అరెస్ట్.. పట్టుబడిన వారంతా మహిళలే

ఏలూరు: రైలులో ఇతర రాష్ట్రాలకు చెందిన మద్యం తరలిస్తున్న ముఠాను కైకలూరు పోలీసులు అరెస్ట్ చేశారు. భారీగా విదేశీ, స్వదేశీ మద్యాన్ని స్వాధీనం చేసుకున్నారు. బుధవారం తెల్లవారుజామున 5:30 గంటలకు ముంబై నుంచి విశాఖపట్నం వెళ్లే ఎల్టీటీ ట్రైన్‌లో ప్రయాణిస్తున్న ముగ్గురు మహిళలను పోలీసులు అదుపులోకి తీసుకున్నారు. మహిళలు చీరాల వైఎస్ఆర్ కాలనీ వాడరేవుకు చెందిన వారుగా గుర్తించారు. 35 నుంచి 45 సంవత్సరాలు వయసు కలిగిన మహిళలు దాదాపు 24 బ్యాగుల్లో భారీగా మద్యం తరలిస్తూ పోలీసులకు చిక్కారు. ముగ్గురు మహిళలు కొన్ని రోజులు క్రితం గోవా వెళ్లి లక్షల విలువైన మద్యం కొనుగోలు చేసి అక్కడ నుంచి తిరిగి ముంబై చేరుకుని.. అక్కడి నుంచి ఎల్టీటీ ట్రైన్‌లో ఈ మద్యాన్ని తరలిస్తున్నట్లు విచారణలో వెల్లడైంది. ఈ ముఠాపై అందిన సమాచారంతో కైకలూరు పట్టణ సీఐ రఘు సిబ్బందితో కలిసి మద్యం తరలిస్తున్న ముఠాను చాకచక్యంగా పట్టుకున్నారు.