Harirama Jogaiah: ఎన్డీఏ భేటీకి జనసేనాని హాజరుపై హరిరామ జోగయ్య లేఖ.. ఏముందంటే..!

పశ్చిమగోదావరి జిల్లా: ఎన్డీఏ సమావేశానికి జనసేన అధినేత పవన్ కళ్యాణ్ (Pawan Kalyan) హాజరుకావడంపై కాపు సంక్షేమ సేన అధ్యక్షుడు హరిరామ జోగయ్య (Harirama Jogaiah) లేఖ రాశారు. లేఖలో ఏముంది అంటే.. ‘‘రాబోయే ఎన్నికల్లో పవన్ చరిష్మాను ఉపయోగించుకుని లబ్ధి పొందాలని బీజేపీ చూస్తోంది. బీజేపీ, జనసేన కలిసి పోటీ చేస్తే గత ఎన్నికల కంటే రెండు శాతం ఓట్లు పెరిగే అవకాశం ఉంది. ఓట్ల శాతాన్ని పెంచుకోవడానికి, జగన్‌ను ఓడించడానికి బీజేపీ చేస్తున్న ప్రయత్నాలు అంతంత మాత్రమే. జగన్ ప్రభుత్వాన్ని ఓడించడానికి బీజేపీ ప్రయత్నం చేయకపోవడానికి ఆయనతో ఉన్న సత్సంబంధాలే కారణం కావచ్చు. నీతివంతమైన పరిపాలన చేస్తున్న మోడీ చరిష్మా, బీజేపీ, జనసేన కూటమికి ఉపయోగపడవచ్చు. రాష్ట్ర విభజన హామీలు నెరవేర్చక పోవడం వల్ల బీజేపీకి సానుకూల పరిస్థితి లేదు. బీజేపీకి మత రాజకీయాల వల్ల కూడా నష్టం కలగజేసే అవకాశం ఉంది. రాష్ట్రంలో అధికారం చేపట్టడానికి బీజేపీతో జనసేన పొత్తు ఎంతవరకు లబ్ధి చేస్తుందని కాలమే చెప్పాలి. జనసేనతో బీజేపీ పొత్తు జనసేనకు కంటే బీజేపీకే ఎక్కువ లాభం జరిగే అవకాశం ఉంది. చంద్రబాబు పరిపాలన దక్షిత, జనసేన పొత్తు పెట్టుకుంటే జనసేనకు కలిసొచ్చే అవకాశం ఉంది. టీడీపీ హయంలో జరిగిన అవినీతి, రంగా హత్య వంటి అంశాలు జనసేనపై ఆ ప్రభావం పడే అవకాశం కూడా ఉంది. పూర్తి కాలం చంద్రబాబుకి ముఖ్యమంత్రి పదవిని కట్టబెట్టడం ద్వారా పవన్ కళ్యాణ్ ప్యాకేజీ తీసుకున్నాడనే వైసీపీ చేసే ప్రచారానికి గురికావాల్సి వస్తుంది.’’ అని లేఖలో హరిరామ జోగయ్య పేర్కొన్నారు.