AP Education: వింతగా ఉన్నత విద్యా శాఖ తీరు!

ఆగస్టు 8 నుంచి డిగ్రీ తరగతులు!!

తరగతులు మొదలైన రెండు నెలలకు అకడమిక్‌ క్యాలెండర్‌

తాజాగా ఆదేశాలిచ్చిన ఉన్నత విద్యాశాఖ

మే 27 నుంచి డిగ్రీ ఫైనలియర్‌ పరీక్షలు

ఏప్రిల్‌ 29 నుంచి బీటెక్‌, బీఫార్మసీ పరీక్షలు

అమరావతి, అక్టోబరు 4(ఆంధ్రజ్యోతి): పెళ్లి పూర్తయిన తర్వాత శుభలేఖలు పంచితే ఎలా ఉంటుందో అలాగే ఉంది ఉన్నత విద్యా శాఖ తీరు. విద్యా సంవత్సరం మొదలై రెండు నెలలు పూర్తయ్యాయి. తరగతులు ప్రారంభమై 60 రోజులు గడిచాయి. ఉన్నత విద్యా శాఖ మాత్రం ఆగస్టు 8న తరగతులు ప్రారంభమవుతాయని నవంబరు 3న అకడమిక్‌ క్యాలెండర్‌ను విడుదల చేసింది. ఆగస్టు 8న డిగ్రీ కోర్సుల తరగతులు, ఆగస్టు 31న బీటెక్‌, బీఫార్మసీ కోర్సుల తరగతులు ప్రారంభం కాగా వాటికి సంబంధించి ఇప్పుడు విద్యా క్యాలెండర్‌ విడుదల చేయడం విశేషం. ఈ మేరకు ఉన్నత విద్యాశాఖ ముఖ్య కార్యదర్శి జె.శ్యామలరావు మంగళవారం ఉత్తర్వులు జారీచేశారు. సాధారణంగా విద్యా సంవత్సరం ప్రారంభంలో అకడమిక్‌ క్యాలెండర్‌ విడుదల చేస్తారు. కానీ తరగతులన్నీ ప్రారంభమైపోయాక... ఫలానా రోజు తరగతులను ప్రారంభించాలంటూ ఉన్నత విద్యాశాఖ ఈ క్యాలెండర్‌లో తెలిపింది. ఇక ద్వితీయ, తృతీయ, నాలుగో సంవత్సరాల విద్యార్థులకు జూలైలోనే తరగతులు ప్రారంభించారు.

సాధారణ డిగ్రీ కోర్సులు

అకడమిక్‌ క్యాలెండర్‌ ప్రకారం సాధారణ డిగ్రీ కోర్సుల్లో ప్రథమ సంవత్సరం మొదటి సెమిష్టర్‌ తరగతులు ఆగస్టు 8న ప్రారంభమవుతాయి. నవంబరు 30న మొదటి సెమిష్టర్‌ తరగతులు ముగుస్తాయి. డిసెంబరు 4 నుంచి 9 వరకు పరీక్షలు జరుగుతాయి. డిసెంబరు 11 నుంచి రెండో సెమిష్టర్‌ తరగతులు ప్రారంభించి, ఏప్రిల్‌ 1 నుంచి 13 వరకు పరీక్షలు నిర్వహిస్తారు. ద్వితీయ సంవత్సరం విద్యార్థులకు... ఆగస్టు 21 నుంచి మూడో సెమిష్టర్‌ మొదలవుతుంది. డిసెంబరు 11 నుంచి 23 వరకు పరీక్షలు జరుగుతాయి. డిసెంబరు 27న నాలుగో సెమిష్టర్‌ తరగతులు ప్రారంభించి, ఏప్రిల్‌ 15 నుంచి 27 వరకు పరీక్షలు నిర్వహించాలి. మే 1 నుంచి జూన్‌ 30 వరకు షార్ట్‌ టర్మ్‌ ఇంటర్న్‌షిప్‌ జరుగుతుంది. మూడో సంవత్సరం విద్యార్థులకు జూలై 15 నుంచి సెప్టెంబరు 2 వరకు ఇంటర్న్‌షిప్‌ జరుగుతుంది. ఐదో సెమిష్టర్‌ తరగతులు సెప్టెంబరు 4న ప్రారంభించి, డిసెంబరు 27 నుంచి జనవరి 6 వరకు పరీక్షలు నిర్వహిస్తారు. జనవరి 8న ఆరో సెమిష్టర్‌ తరగతులు ప్రారంభమవుతాయి. ఏప్రిల్‌ 29 నుంచి మే 8 వరకు పరీక్షలు జరుగుతాయి. నాలుగో సంవత్సరం విద్యార్థులకు అక్టోబరు 3న ఏడో సెమిష్టర్‌ తరగతులు ప్రారంభమవుతాయి. జనవరి 29 నుంచి ఫిబ్రవరి వరకు 3 వరకు పరీక్షలు జరుగుతాయి. ఫిబ్రవరి 5న ఎనిమిదో సెమిష్టర్‌ ప్రారంభమవుతుంది. మే 27 నుంచి జూన్‌ 1తో చివరి సెమిష్టర్‌ పరీక్షలు జరిగి డిగ్రీ కోర్సు ముగుస్తుంది.

బీటెక్‌, బీఫార్మసీ కోర్సులు

బీటెక్‌, బీఫార్మసీ కోర్సుల్లో మొదటి సంవత్సరం విద్యార్థులకు ఆగస్టు 31న మొదటి సెమిష్టర్‌ తరగతులు ప్రారంభమవుతాయి. జనవరి 18 నుంచి పరీక్షలు జరుగుతాయి. జనవరి 30న రెండో సెమిష్టర్‌ ప్రారంభించి, జూన్‌ 15 నుంచి పరీక్షలు నిర్వహిస్తారు. ద్వితీయ సంవత్సరం విద్యార్థులకు ఆగస్టు 7న మూడో సెమిష్టర్‌ తరగతులు ప్రారంభమవుతాయి. డిసెంబరు 11 నుంచి పరీక్షలు జరుగుతాయి. నాలుగో సెమిష్టర్‌ తరగతులు డిసెంబరు 27న ప్రారంభమవుతాయి. ఏప్రిల్‌ 29 నుంచి పరీక్షలు నిర్వహిస్తారు. మే 13 నుంచి జూలై 6 వరకు కమ్యూనిటీ సర్వీసు ప్రాజెక్టు చేయాలి. మూడో సంవత్సరం విద్యార్థులకు జూలై 17న ఐదో సెమిష్టర్‌ ప్రారంభమవుతుంది. డిసెంబరు 18నుంచి పరీక్షలు జరుగుతాయి. జనవరి 1 నుంచి ఆరో సెమిష్టర్‌ మొదలవుతుంది. మే 20 నుంచి పరీక్షలు జరుగుతాయి. జూన్‌ 3 నుంచి జూలై 27 వరకు షార్ట్‌ టర్మ్‌ ఇంటర్న్‌షిప్‌ జరుగుతుంది. నాలుగో సంవత్సరం విద్యార్థులకు జూలై 17 నుంచి ఏడో సెమిష్టర్‌ ప్రారంభమవుతుంది. డిసెంబరు 18 నుంచి పరీక్షలు జరుగుతాయి. జనవరి 1న ఎనిమిదో సెమిష్టర్‌ మొదలవుతుంది. అదే రోజు నుంచి ఏప్రిల్‌ 20 వరకు సెమిష్టర్‌ ఇంటర్న్‌షిప్‌ చేయాలి. ఏప్రిల్‌ 29 నుంచి చివరి సెమిష్టర్‌ పరీక్షలు జరుగుతాయి.