Coconut oil: నూనె రాసుకొని నిద్రపోతున్నారా? అయితే ఈ విషయం తెలియాల్సిందే!

నూనె రాసుకొని- రాత్రంతా వదిలేస్తే ఏమవుతుంది? జుట్టు నిగనిగలాడిపోతుందా? నిగనిగలాడదు సరికదా సమస్యలు ఎదురవుతాయంటున్నారు సౌందర్యనిపుణులు. నూనె రాసుకొనే విషయంలో వారేమంటున్నారో చూద్దాం..

• కొబ్బరి నూనె, ఆల్మండ్‌ నూనెలలో ఫ్యాటీ యాసిడ్స్‌, ట్రైగ్లిజరేట్స్‌ ఎక్కువగా ఉంటాయి. వీటి వాటితే జుట్టుకు మెరుపు వస్తుంది.

• కొబ్బరినూనె వంటి వాటిలో విటమిన్‌ సి..ఈలు ఉంటాయి. ఇవి వాతావరణం వల్ల జుట్టుకు కలిగే ఇబ్బందులను సరిచేయటంలో ముఖ్యమైన పాత్ర పోషిస్తాయి.

• నూనెను తలకు రాసి మర్దనా చేయటం వల్ల తల పైభాగంలో రక్తప్రసరణ పెరుగుతుంది. రక్తప్రసరణ పెరగటం వల్ల జుట్టు ఒత్తుగా పెరుగుతుంది.

నూనె రాసుకొని నిద్రపోతే..?

• తలపై చిన్న చిన్న రంధ్రాలు ఉంటాయి. వీటి నుంచి జుట్టు పెరుగుతుంది. తలకు నూనె రాసుకొని ఎక్కువ సేపు వదిలేస్తే ఈ రంధ్రాలు పూడుకుపోతాయి. కొన్ని సార్లు చిన్న చిన్న పొక్కులు కూడా వస్తాయి. అందువల్ల నూనె రాసుకొన్న కొద్ది సేపటికే జుట్టును శుభ్రం చేసుకోవాలి.

• నూనెను రాసుకొని ఎక్కువ సేపు వదిలేస్తే- సేబోర్హిక్‌ డెర్మేటిటిస్‌ అనే సమస్య ఏర్పడవచ్చు. దీని వల్ల తలపై చుండ్రు మాదిరిగా పచ్చటి రేణువులు వస్తాయి. కొందరికి తల మీదే కాకుండా కనుబొమ్మలు, చెవులలో కూడా ఈ రేణువులు ఏర్పడతాయి.

• నూనె కారడం వల్ల ముఖంపై చర్మం బీటలు వారిపోతుంది. అందువల్ల జుట్టుకు నూనె రాసుకున్న 30 నిమిషాల తర్వాత శుభ్రం చేసుకోవాలి.