Pakistan : పాకిస్థాన్‌లో పెట్రోలు, డీజిల్ ధరల గురించి తెలుసుకుంటే..
ABN , First Publish Date - 2023-09-01T11:57:33+05:30 IST
వరదలు, ఆర్థిక సంక్షోభంలో చిక్కుకున్న పాకిస్థాన్‌లో పెట్రోలు, డీజిల్ ధరలు సామాన్యులకు చుక్కలు చూపిస్తున్నాయి. ఒక సంక్షోభం నుంచి మరొక సంక్షోభంలోకి జారుకుంటున్న ఆ దేశంలో తాజాగా లీటరు పెట్రోలు ధర రూ.14.91 పెరగింది, హైస్పీడ్ డీజిల్ ధర లీటరుకు రూ.18.44 చొప్పున పెరిగింది.
ఇస్లామాబాద్ : వరదలు, ఆర్థిక సంక్షోభంలో చిక్కుకున్న పాకిస్థాన్‌లో పెట్రోలు, డీజిల్ ధరలు సామాన్యులకు చుక్కలు చూపిస్తున్నాయి. ఒక సంక్షోభం నుంచి మరొక సంక్షోభంలోకి జారుకుంటున్న ఆ దేశంలో తాజాగా లీటరు పెట్రోలు ధర రూ.14.91 పెరగింది, హైస్పీడ్ డీజిల్ ధర లీటరుకు రూ.18.44 చొప్పున పెరిగింది. దీంతో లీటరు పెట్రోలు ధర రూ.305.36కు చేరింది, లీటరు డీజిల్ ధర రూ.311.84కు చేరింది. పాకిస్థాన్ ఆర్థిక మంత్రిత్వ శాఖ గురువారం ఈ నిర్ణయాన్ని ప్రకటించింది.
దశాబ్దాల చరిత్రలో ఎరుగనంతటి తీవ్ర స్థాయి సంక్షోభంలో పాకిస్థాన్ చిక్కుకున్న సంగతి తెలిసిందే. ఇటీవలి ఆర్థిక సంస్కరణలు విపరీతమైన ద్రవ్యోల్బణానికి, అత్యధిక వడ్డీ రేట్లకు దారి తీశాయి. దీంతో ప్రజలు, వ్యాపారులు తీవ్ర ఒత్తిడికి గురవుతున్నారు. పాకిస్థానీ రూపాయి విలువ పతనం కొనసాగుతుండటంతో సెంట్రల్ బ్యాంకు వడ్డీ రేట్లను పెంచుతోంది. పాకిస్థానీ రూపాయి ఒక అమెరికన్ డాలర్‌కు రికార్డు స్థాయి కనిష్టానికి పతనమైంది. ఒక డాలర్‌కు రూ.305.6కు కరెన్సీ పతనమవడం తీవ్ర ప్రభావాన్ని చూపుతోంది.
పాకిస్థాన్ నేషనల్ అసెంబ్లీకి త్వరలో ఎన్నికలు జరుగుతాయి. ప్రస్తుతం తాత్కాలిక ప్రధాన మంత్రి అన్వరుల్ హక్ కకర్ నేతృత్వంలోని మంత్రివర్గం పరిపాలన బాధ్యతలను నిర్వహిస్తోంది. ఆర్థిక స్థిరత్వం దిశగా దేశాన్ని నడపటం ఈ తాత్కాలిక ప్రభుత్వ బాధ్యత. అంతర్జాతీయ ద్రవ్య నిధి సంస్థ 3 బిలియన్ డాలర్లు ఉద్దీపన ప్యాకేజీకి అంగీకరించడంతో పాకిస్థాన్ కాస్త ఊపిరి తీసుకుంటోంది.
ఇవి కూడా చదవండి :
One Nation-One Election : ‘ఒక దేశం-ఒకేసారి ఎన్నికలు’ కోసం కేంద్రం మరో ముందడుగు
