Ajit Pawar Vs Sharad Pawar: ఎన్‌సీపీ నేతలతో అజిత్ పవార్ సమావేశం...నాకు తెలియదన్న పవార్..!

ముంబై: మహారాష్ట్రలోని నేషనలిస్ట్ కాంగ్రెస్ పార్టీ (NCP)లో ఆదివారంనాడు ఆసక్తికర పరిణామాలు చోటుచేసుకున్నాయి. ముంబైలోని తన నివాసంలో ఎన్‌సీపీ నేతలను అజిత్ పవార్ (Ajit pawar) కలుసుకున్నారు. అయితే, ఈ సమావేశం గురించి తనకు తెలియదని పుణెలో ఉన్న ఎన్‌సీపీ చీఫ్ శరద్ పవార్ (Sharad Pawar) మీడియాకు చెప్పారు. దీంతో ఎన్‌సీపీలో ఏమి జరగుతోందోనన్న ఉత్కంఠ నెలకొంది.

అసెంబ్లీలో ఎన్‌సీపీ విపక్ష నేతగా కొనసాగడం తనకు ఇష్టం లేదని, పార్టీలో ఏ పదవి ఇచ్చినా తనకు సమ్మతమేనని ఇటీవల అజిత్ పవార్ సంచలన ప్రకటన చేశారు. ఈ నేపథ్యంలో ఎన్‌సీపీ నేతలతో ఆయన ఆదివారం సమావేశం కావడం ప్రాధాన్యత సంతరించుకుంది. అజిత్ పవార్ అధికారిక నివాసం 'దేవ్‌గిరి'లో ఏర్పాటు చేసిన సమావేశంలో ఎన్‌సీపీ సీనియర్ నేత ఛగన్ భుజ్‌బల్, పార్టీ వర్కింగ్ ప్రెసిడెంట్ సుప్రియా సూలే పాల్గొన్నారు. పలువురు ఎమ్మెల్యేలు కూడా సమావేశానికి హాజరయ్యారు. అయితే, పార్టీ రాష్ట్ర అధ్యక్షుడు జయంత్ పాటిల్ ఈ సమావేశానికి దూరంగా ఉన్నారు. కాగా, ఈ సమావేశం ఎజెండా ఏమటనేది వెంటనే తెలియలేదు.

నాకు తెలియదే..?: పవార్

ముంబైలో జరిగిన సమవేశం గురించి తనకు తెలియదని ఎన్‌సీపీ చీఫ్ శరద్ పవార్ మీడియాతో చెప్పారు. పార్టీకి సంబంధించిన అంశాలపై చర్చించి నిర్ణయం తీసుకునేందుకు జూలై 6న సీనియర్ నేతలతో తాను సమావేశం ఏర్పాటు చేసినట్టు చెప్పారు. లోక్‌సభలో విపక్ష నేతగా అజిత్ పవార్ తన నివాసంలో సమావేశం ఏర్పాటు చేసి ఉండవచ్చని పవార్ అన్నారు.