Former Chief Minister: మాజీ సీఎం సూటి ప్రశ్న.. మరి నితీష్‌కుమార్‌ ఏ టీమ్‌?

బెంగళూరు, (ఆంధ్రజ్యోతి): బీజేపీకి జేడీఎస్‌ బీ-టీమ్‌ అంటూ పదే పదే ఆడిపోసుకుంటున్న కాంగ్రెస్‌ నేతలు బీహార్‌ ముఖ్యమంత్రి నితీష్ కుమార్‌ ఏ టీమ్‌కు చెందిన వారో చెప్పాలని జేడీఎస్‏కు చెందిన మాజీ ముఖ్యమంత్రి హెచ్‌డీ కుమారస్వామి(Former Chief Minister HD Kumaraswamy) సూటిగా ప్రశ్నించారు. నగరంలో సోమవారం ఆయన మీడియాతో మాట్లాడుతూ నితీశ్‌కుమార్‌(Nitish Kumar) ఒకసారి బీజేపీతో కలిసి, మరోసారి ఆర్జేడీతో కలిసి అధికారం పంచుకుని ఇప్పుడు కాంగ్రెస్‌ వంచన చేరారన్నారు. అవకాశం లభిస్తే అధికారంలోకి రావడం తప్పుకాదని అయితే మీరు చేస్తే ఒప్పు, మేము చేస్తే తప్పు అనేలా వ్యవహరించడం సరికాదని కాంగ్రె్‌స కు ఆయన హితవు పలికారు. కన్నడనాట తమ పార్టీ కేవలం ఒకసారి మాత్రమే బీజేపీతో కలిసి ప్రభుత్వాన్ని ఏర్పాటు చేసిందన్నారు. రాష్ట్రంలో గ్యారెంటీలు అమలైనా రైతుల ఆత్మహత్యలు జరుగుతున్నాయని, వారి సమాధులపై ప్రతిపక్ష నేతల సమావేశాన్ని పంచతార హోటల్లో నిర్వహిస్తుండడం విచారకరమని ఆయన అన్నారు. రాష్ట్రంలో కాంగ్రెస్‌ అధికార పగ్గాలు చేపట్టిన తర్వాత ప్రభుత్వ అధికారులు, ఉద్యోగుల బదిలీల్లో ఏకంగా రూ.500 కోట్లు చేతులు మారాయని, ఈ డబ్బుతో ప్రతిపక్షనేతలకు విందులు వినోదాలు ఏర్పాటు చేస్తున్నట్లుందని ఆయన ఎద్దేవా చేశారు.