VK Singh: పాక్‌ను ఐసొలేట్ చేయాలి: వీకే సింగ్

న్యూఢిల్లీ: ఇండియాపై ఉగ్రదాడులకు అడ్డుకట్టు వేయాలంటే పాకిస్థాన్‌ (Pakistan)ను ఒంటరి (Isolate) చేయాల్సిన అవసరం ఉందని కేంద్ర మంత్రి వీకే సింగ్ (VK Singh) అన్నారు. జమ్మూకశ్మీర్‌లోని అనంత్‌నాగ్‌లో బుధవారంనాడు ఉగ్రవాదులతో జరిగిన భీకర కాల్పుల్లో కల్నల్ మన్‌ప్రీత్ సింగ్, మేజర్ ఆశిష్ ధోనక్, డీఎస్‌పీ హుమయూన్ ప్రాణాలు కోల్పోవడంపై వీకే సింగ్ స్పందించారు.

''మనం బాగా ఆలోచన చేయాలి. పాకిస్థాన్‌ను మనం ఒంటరిని చేయకపోతే ఉగ్రదాడులను పాకిస్థాన్ నిత్యకృత్యం చేస్తూనే ఉంటుంది. మనం వాళ్లపై (పాక్) ఒత్తిడి తేవాలనుకుంటే వారిని ఒంటరిని చేయాల్సి ఉంటుంది. సాధారణ సంబంధాలు నెలకొనాలని అవతళ వాళ్లు అభిలషిస్తేనే అది సాధ్యమవుతుంది. ఆ విషయాన్ని పాక్‌ గ్రహించాల్సి ఉంటుంది'' అని వీకే సింగ్ అన్నారు.

కాగా, అనంతనాగ్ దాడికి తామే బాధ్యులమని లష్కరే తోయిబా (ఎల్‌ఈటీ) ఆఫ్‌షూట్ ది రెసిస్టెన్స్ ఫ్రంట్ ప్రకటించినట్టు అధికారులు గురువారంనాడు వెల్లడించారు. ఈ నెల ప్రారంభంలో పాక్ ఆక్రమిత కశ్మీర్ (పీఓకే)లో తమ అనుభవజ్ఞుడైన నాయకుడిని చంపినందుకు ప్రతీకార చర్యగా ఈ దాడి చేసినట్లు లష్కరే తోయిబా ప్రకటించింది. ఈ ఉగ్రదాడికి ప్రతీకారంగా భారత ఆర్మీ అనంతనాగ్‌లో కౌంటర్ టెర్రర్ ఆపరేషన్ మొదలుపెట్టింది. ఇద్దరు ఉగ్రవాదులను చుట్టుముట్టినట్లు జమ్మూ కాశ్మీర్ పోలీసులు తెలిపారు. ఉగ్రవాదుల్లో ఒకరిని ఉజైర్ ఖాన్‌గా గుర్తించారు.