Lucknow: వాజ్‌పేయి స్టేడియం హోర్డింగ్ కుప్పకూలి ఇరువురి దుర్మరణం

లక్నో: ఉత్తరప్రదేశ్‌ రాజధాని లక్నో (Lucknow)లో విషాద ఘటన చోటుచేసుకుంది. అటల్ బిహారీ వాజ్‌పేయి (BRSABV Ekana Stadium) స్టేడియం హోర్డింగ్ (hoarding) ఒక కారుపై పడి అందులో ప్రయాణిస్తున్న ఇద్దరు మహిళలు మృతిచెందారు. లోహియా ఆసుపత్రికి తరలించే సరికే ఇద్దరూ ప్రాణాలు కోల్పోయినట్టు వైద్యులు ధ్రువీకరించారు. సోమవారం బలమైన ఈదురు గాలులు లక్నోను తాకడంతో హోర్డింగ్ కుప్పకూలింది. ఆ సమయంలో అక్కడే నిలిపి ఉంచిన కారుపై పడటంతో ఈ దుర్ఘటన చోటుచేసుకుంది. ఈ ఘటనలో గాయపడిన మూడో వ్యక్తి ప్రస్తుతం ఆసుపత్రిలో చికిత్స పొందుతున్నారు.

కాగా, ప్రమాద సమాచారం తెలిసిన వెంటనే పోలీసులు ఘటనా స్థలికి చేరుకున్నారని, గాయపడిన ముగ్గురినీ ఆసుపత్రికి తరలించినప్పటికీ ఇద్దరు మహిళలు మృతి చెందినట్టు అధికారులు తెలిపారు. అనంతరం జేసీబీ సాయంతో ఘటనా స్థలిలోని హోర్డింగ్‌ను తొలగించారు.