Ramdas Athawale: నితీష్ ఏ క్షణంలోనైనా ఎన్డీయేలోకి...?

పాట్నా: విపక్షాల కూటమి ఇండియా (INDIA) ఏర్పాటుకు మొదట్నించీ విస్తృతంగా కసరత్తు చేస్తూ, ఇటీవల పాట్నాలో కూటమి సమావేశానికి ఆతిథ్యమిచ్చిన బీహార్ ముఖ్యమంత్రి నితీష్ కుమార్ (Nitish kumar)పై నరేంద్ర మోదీ ప్రభుత్వంలో మంత్రిగా ఉన్న రామ్‌దాస్ అథవాలే (Ramdas Athawale) సంచలన వ్యాఖ్యలు చేశారు. నితీష్ ఏ క్షణంలోనైనా ఎన్డీయే (NDA)లో చేరుతారని, నితీష్ తమ వాడని అన్నారు. బీహార్‌లో నితీష్ చేసిన అభివృద్ధి పనులపైనా ప్రశంసలు కురిపించారు. పాట్నాలో శనివారంనాడు మీడియాతో మాట్లాడుతూ అథవాలే ఈ వ్యాఖ్యలు చేశారు.

వివాదాస్పద వ్యాఖ్యలతో తరచు వార్తల్లో ఉండే అథవాలే వివిధ కార్యక్రమాల్లో పాల్గొనేందుకు ముంగెర్ వచ్చారు. ఈ సందర్భంగా ఎన్డీయేలో చేరడానికి నితీష్ ఇష్టపడతారా అని మంత్రిని మీడియా ప్రశ్నించగా, గతంలో ఆయన తమతోనే (బీజేపీ) ఉన్నారని, ఎప్పుడైనా ఆయన తమతో చేతులు కలపవచ్చని జవాబిచ్చారు. ముంబై సమావేశానికి వెళ్లవద్దని కూడా నితీష్‌కు ఆయన విజ్ఞప్తి చేశారు. బీహార్‌లో నితీష్ కుమార్ చేసిన అభివృద్ధి పనులు చాలానే ఉన్నాయని, చాలాకాలం క్రితం తాను బీహార్ వచ్చినప్పుడు రోడ్లు బాగుండేవి కావని, ఇప్పుడు నితీష్ సారథ్యంలో రోడ్డన్నీ చక్కగా ఉన్నాయని అథవాలే ప్రశంసించారు.