Vanitha Vijaykumar: తెలుగులో నటించడంపై మనసులో మాట చెప్పేసిన తమిళ నటి

తిరుమల, (ఆంధ్రజ్యోతి): మంచిపాత్రలు వస్తే తిరిగి తెలుగులో నటిస్తానని సినీ నటి వనిత విజయ్‌కుమార్‌(Vanitha Vijaykumar) అన్నారు. మంగళవారం ఉదయం ఆమె తిరుమల వేంకటేశ్వరస్వామిని దర్శించుకున్నారు. దర్శనానంతరం ఆలయం ముందు మీడియాతో మాట్లాడారు. ‘మళ్లీపెళ్లి’ అనే చిత్రం ద్వారా చాలా రోజుల తర్వాత తెలుగులో నటించానని సంతోషం వ్యక్తం చేశారు. తిరిగి తెలుగు ప్రేక్షకుల ముందుకు రావడం ఆనందంగా ఉందన్నారు. ‘దేవి’ చిత్రంలో తాను చేసిన సుశీల పాత్రను 25 ఏళ్లు గడుస్తున్నా.. తెలుగు ప్రేక్షకులు మర్చిపోలేదన్నారు. దర్శనానికి వెళ్లే సమయంలో కూడా చాలామంది సుశీల అంటూ పలకరించారన్నారు. మంచి కథలు, పాత్రలు వస్తే తెలుగులో తప్పకుండా మరిన్ని చిత్రాల్లో నటిస్తానని చెప్పారు.