Chief Minister's Houses: సీఎం నివాసం వద్ద ఆసక్తికర సంఘటన.. ఆటోకు రివర్స్‌.. బెంజికి ఓ ఎస్‌..!

- సీఎం ఇంటికి బిర్యానీ రాకపై సిబ్బంది వింత నిర్ణయం

(బెంగళూరు, ఆంధ్రజ్యోతి): బక్రీద్‌ పండుగ అంటే గుర్తొచ్చేది బిర్యానీ.. సీఎం సిద్దరామయ్య(CM Siddaramaiah) బిర్యానీ ప్రియుడని ప్రతీతి. అయితే బక్రీద్‌ బిర్యానీపై సీఎం సిద్దరామయ్య అధికారిక నివాసం వద్ద గురువారం ఆసక్తికర సంఘటన చోటు చేసుకుంది. సిద్దరామయ్యకు ఆప్తుడు, శిష్యుడిగా గుర్తింపు కల్గిన మంత్రి జమీర్‌ అహ్మద్‌ఖాన్‌ ప్రత్యేక బిర్యానీ వంటకాలను సిద్ధం చేయించారు. వాటిని శివానంద సర్కిల్‌లోని సీఎం నివాసానికి ఆటోలో పంపారు. ముఖ్యమంత్రి నివాసం చెంతకు ఆటో రాగానే భద్రతా సిబ్బంది అడ్డుకున్నారు. ఆటోను వెనక్కి తిప్పి పంపారు. దీంతో వంటకాలతో చామరాజపేటకు వెనక్కి వచ్చింది. వెంటనే విషయం తెలుసుకుని బిర్యానీని బెంజ్‌ కారులో అమర్చి నేరుగా సీఎం నివాసానికి పంపారు. ఈ సారి బెంజి కారు కావడంతో సిబ్బది అభ్యంతరం తెలపలేదు. బిర్యానీ అయినా ఆటో కాకుండా బెంజ్‌ కారులో రావడంతోనే సీఎంఓలోకి అనుమతించడం చర్చనీయాంశమయ్యింది.