Viral Video: దుస్తుల్ని, చెప్పులను బాగా విధిలించి వేసుకోమనేది ఇందుకే.. ఓ వ్యక్తి షూ వేసుకోబోతే ఏం జరిగిందో మీరే చూడండి..
ABN , First Publish Date - 2023-10-11T13:00:32+05:30 IST
పెద్దలు ఏదైనా చెబితే చాలామంది విసుక్కుంటారు తప్ప మంచికే అని అర్థం చేసుకోరు. ఓ వ్యక్తి హడావిడిగా షూ వేసుకోబోతే జరిగిందిదీ..
పెద్దవాళ్లు ఏం చెప్పినా చాదస్తం అని కొట్టిపారేస్తుంటారు. వారు చెప్పేమాటల వెనుక ఎంతో అర్థం ఉంటుంది. పెద్దల మాట చెవికెక్కించుకునేవారు తక్కువ. కానీ వారి మాటలు ఖచ్చితంగా జీవితంలో ఏదో ఒక సందర్బంలో మంచి చేస్తాయి, ప్రమాదాల నుండి రక్షిస్తాయి. ఓ వ్యక్తి బయటకు వెళదాం అని ఇంటి బయట ఉన్న షూ వేసుకోవడానికి వెళ్లగా అతనికి పెద్ద షాకే తగిలింది. ఈ సంఘటనకు సంబంధించిన వీడియో ఇప్పుడు సోషల్ మీడియాలో వైరల్ అవుతోంది. ఈ వీడియో చూసినవారి వెన్ను చల్లగా అయిపోతోంది. దీని గురించి పూర్తీ వివరాల్లోకి వెళితే..
పెద్దవారు ఏం చెప్పినా చాదస్తం అని విసుక్కునేవారు ఎక్కువ. కానీ పెద్దల మాట చద్దిమూట అనే మాట అప్పుడప్పుడూ అనుభవపూర్వకంగా తెలిసొస్తుంది. ఓ వ్యక్తి తన ఇంటి బయట ప్రాంతంలో షూస్ వదిలాడు. అతను బయటకు వెళ్లే ఉద్దేశ్యంతో ఇంటి బయటకు వచ్చాడు. తన షూస్ ను వేసుకోబోయే సమయంలో షూ లో నుండి ఏదో శబ్దం వినిపించింది. ఏమై ఉంటుందా అని అతను షూను కదిలించి చూడగా షూలో నుండి బుస్సుమంటూ పిల్లనాగుపాము(baby cobra in shoe) బయటకు వచ్చింది. దాన్ని చూడగానే అతనికి ఒక్కసారిగా గుండె ఆగినంత పనైంది. ఆ తరువాత పామును తన ఫోన్ కెమెరాతో వీడియో తీయడం మొదలు పెడతాడు. ఈ క్రమంలో కెమెరాను పాము ముందుకు తీసుకెళ్లగా ఆ పాము బుస్సుమంటూ అతనిమీదకు వెళ్లడానికి ప్రయత్నిస్తుంది. కానీ ఈ పిల్ల నాగుపాము మాత్రం చాలా అందంగా ఉంది. ఆ పాము రంగు, దాని చర్మం, దాని పడగ, మెడ దగ్గర గీతలు ఎంతో ఆకర్షణగా కనిపిస్తున్నాయి. పొరపాటున చూసుకోకుండా షూ వేసుకుని ఉంటే ప్రాణాలు గాల్లో కలిసిపోయేవే. ఈ మధ్యకాలంలో ఇంటి బయట పార్క్ చేసిన బైక్ లలోనూ, బైక్ లకు తగిలించిన హెల్మెట్లలోనూ పాములు కనిపిస్తూ ప్రజలను భయాందోళనకు గురిచేస్తున్నాయి.
Health Tips: కొరియన్ అమ్మాయిల అందం వెనుక రహస్యం ఇదేనా.. కేవలం ఇదొక్కటి తాగడం వల్ల అంత మ్యాజిక్కా..
ఈ వీడియోను ఐఎఫ్ఎస్ అధికారి Susanta Nanda తన ట్విట్టర్ ఎక్స్(Twitter X) అకౌంట్లో షేర్ చేశారు. పిల్లనాగుపాము షూస్ వేసుకోవడానికి ట్రై చేస్తుంది అంటూ చమత్కరించారు. ఈ వీడియో చూసిన నెటిజన్లు షాకవుతున్నారు. 'వామ్మో ఈ సంఘటన చూస్తుంటే ఇకమీదట షూ వేసుకోవాలంటే భయపడాల్సి వస్తుంది' అని ఒకరు కామెంట్ చేశారు. 'ఆ పామును చూస్తుంటే కలలోకి వచ్చేలాగా ఉంది' అని మరొకరు కామెంట్ చేశారు. 'నేను ఒకసారి షూలో కప్ప ఉన్న విషయాన్ని చూసుకోకుండా షూ వేసుకున్నాను, దాని స్థానంలో ఈ పామును ఊహిస్తే భయంకరంగా ఉంది' అని మరొకరు కామెంట్ చేశారు.
