Team india: కొత్త జెర్సీలో టీమిండియా ఆటగాళ్లు.. నెటిజన్‌ల విమర్శలు
ABN , First Publish Date - 2023-07-11T18:55:28+05:30 IST
వెస్టిండీస్‌తో టెస్ట్ సిరీస్ కోసం టీమిండియా ఆటగాళ్లు కొత్త జెర్సీలను ధరించారు. కెప్టెన్ రోహిత్ శర్మ, విరాట్ కోహ్లీ, శుభ్‌మన్ గిల్, యషస్వీ జైశ్వాల్, రుతురాజ్ గైక్వాడ్ రవీంద్ర జడేజా, ఆజింక్యా రహానె వంటి ఆటగాళ్లు కొత్త జెర్సీలను ధరించి ఫోటోలు దిగారు. అయితే కొత్త జెర్సీలు చెత్తగా ఉన్నాయంటూ సోషల్ మీడియాలో అభిమానులు విమర్శలు సంధిస్తున్నారు.
వెస్టిండీస్‌(West Indies)తో రెండు టెస్టుల సిరీస్‌కు టీమిండియా (Team India) సిద్ధమైంది. బుధవారం నుంచి డొమినికా వేదికగా జరిగే తొలి టెస్టులో భారత్ తలపడనుంది. ఈ సిరీస్ నుంచి టీమిండియా ఆటగాళ్లు కొత్త జెర్సీ(New Jersey)లో కనిపించనున్నారు. ప్రస్తుతం భారత జట్టుకు లీడ్ స్పాన్సర్‌గా డ్రీమ్ ఎలెవన్ (Dream 11) వ్యవహరిస్తోంది. దీంతో డ్రీమ్ ఎలెవన్ కొత్త జెర్సీలను ధరించి ఆటగాళ్లు ఫోటోలకు పోజులు ఇవ్వగా సోషల్ మీడియా (Social Media)లో వైరల్‌గా మారింది. అయితే కొత్త జెర్సీలు చెత్తగా ఉన్నాయంటూ సోషల్ మీడియాలో అభిమానులు విమర్శలు సంధిస్తున్నారు. అవి అసలు టెస్టు మ్యాచ్ జెర్సీల్లా లేవని దుమ్మెత్తి పోస్తున్నారు. లీడ్ స్పాన్సర్ కలర్ రెడ్‌లో ఉండటం అసలు బాగోలేదని పెదవి విరుస్తున్నారు.
ఐపీఎల్ ముగిసిన వెంటనే ఐసీసీ టెస్ట్ ఛాంపియన్ షిప్ ఫైనల్ ముందు లీడ్ స్పాన్సర్ల కోసం బీసీసీఐ (BCCI) టెండర్లను ఆహ్వానించింది. అయితే ఆ సమయంలో ఎవరూ ఆసక్తి చూపించలేదు. దీంతో లీడ్ స్పాన్సర్ లేకుండానే టీమిండియా ఆటగాళ్లు ఆస్ట్రేలియాతో ఐసీసీ టెస్ట్ ఛాంపియన్ షిప్ ఆడారు. టూల్ కిట్ స్పాన్సర్‌గా మాత్రం ప్రముఖ స్పోర్ట్స్‌వేర్ కంపెనీ అడిడాస్ వ్యవహరించింది. తాజాగా ఇటీవల మరోసారి లీడ్ స్పాన్సర్ కోసం టెండర్లను ఆహ్వానించగా ప్రముఖ ఫాంటసీ క్రికెట్ లీగ్ యాప్ డ్రీమ్ ఎలెవన్ భారీ మొత్తంలో టెండర్ దాఖలు చేసింది. దీంతో డ్రీమ్ ఎలెవన్‌ను బీసీసీఐ ఖరారు చేసింది. ఈ క్రమంలో వెస్టిండీస్‌తో టెస్ట్ సిరీస్ కోసం టీమిండియా ఆటగాళ్లు కొత్త జెర్సీలను ధరించారు. కెప్టెన్ రోహిత్ శర్మ, విరాట్ కోహ్లీ, శుభ్‌మన్ గిల్, యషస్వీ జైశ్వాల్, రుతురాజ్ గైక్వాడ్ రవీంద్ర జడేజా, ఆజింక్యా రహానె వంటి ఆటగాళ్లు కొత్త జెర్సీలను ధరించి ఫోటోలు దిగారు.
ఇది కూడా చదవండి: Yuvraj Singh: యువరాజ్ సంచలన వ్యాఖ్యలు.. టీమిండియాకు అంత సీన్ లేదు
కాగా వెస్టిండీస్‌తో టెస్ట్ సిరీస్‌కు రోహిత్ శర్మ కెప్టెన్‌గా, ఆజింక్యా రహానె వైస్ కెప్టెన్‌గా వ్యవహరించనున్నారు. రోహిత్ ఫామ్ అభిమానులను కలవరపరుస్తుండగా రహానె మాత్రం ధీమాతో కనిపిస్తున్నాడు. ఐపీఎల్‌లో చెన్నై సూపర్ కింగ్స్ తరఫున రాణించడంతో సెలక్టర్లు మరోసారి టెస్ట్ జట్టుకు ఎంపిక చేశారు. ఐసీసీ టెస్ట్ ఛాంపియన్ షిప్ ఫైనల్లో రెండు ఇన్నింగ్స్‌ల్లోనూ రహానె తన ఆటతీరుతో ఆకట్టుకున్నాడు. ఏడాదిన్నరగా ఫిట్‌నెస్ విషయంలో శ్రద్ధ వహించడంతో పాటు ఆటపై ఫోకస్ పెట్టడంతో తిరిగి తాను జట్టులో చోటు సంపాదించినట్లు రహానె వెల్లడించాడు.
