WPL: ఢిల్లీ కేపిటిల్స్‌పై టాస్ నెగ్గిన గుజరాత్ జెయింట్స్

నవీ ముంబై: మహిళల ప్రీమియర్ లీగ్ (WPL)లో భాగంగా నేడు మరో కీలక మ్యాచ్ జరగబోతోంది. పాయింట్ల పట్టికలో కింది నుంచి రెండో స్థానంలో ఉన్న గుజరాత్ జెయింట్స్(Gujarat Giants), పై నుంచి రెండో స్థానంలో ఉన్న ఢిల్లీ కేపిటల్స్(Delhi Capitals) తలపడబోతున్నాయి. టాస్ గెలిచిన జెయింట్స్ బ్యాటింగ్ ఎంచుకుంది. మూడు మ్యాచ్‌లు ఆడి రెండింటిలో ఓడిన జెయింట్స్ ఈ మ్యాచ్‌లో విజయం సాధించి ముందడుగు వేయాలని భావిస్తోంది. అన్నే మ్యాచ్‌లు ఆడి రెండు విజయాలతో ఊపుమీదున్న ఢిల్లీ కేపిటల్స్.. గుజరాత్‌ను చిత్తు చేసి అగ్రస్థానానికి దూసుకెళ్లాలని పట్టుదలగా ఉంది.

మెగ్ లానింగ్(Meg Lanning) సారథ్యంలోని ఢిల్లీ జట్టు అన్ని విభాగాల్లోనూ పటిష్ఠంగా ఉంది. మరీ ముఖ్యంగా బ్యాటర్లు చక్కగా రాణిస్తున్నారు. షెఫాలీ వర్మ, జెమీమా రోడ్రిగ్స్, లారా హారిస్, మరిజాన్ కాప్ వంటి వారు ఆ జట్టుకు అదనపు బలం. రాధా యాదవ్, శిఖా పాండే, తారా నోరిస్ వంటి వారితో బౌలింగ్ విభాగం బలంగా ఉంది.

లారా వోల్వార్డ్, హర్లీన్ డియోల్, ఆష్లీ గార్డనర్, కెప్టెన్ స్నేహ్ రాణా వంటి వారితో గుజరాత్ బ్యాటింగ్ విభాగం బలంగా ఉన్నప్పటికీ పరుగులు సాధించడంలో విఫలమవుతున్నారు. ఫలితంగా ఓటములు కొనితెచ్చుకుంటోంది. లోపాలను సరిదిద్దుకోవడం ద్వారా విజయమే లక్ష్యంగా బరిలోకి దిగుతోంది.