Jio AirFiber: వినాయకచవితి నుంచే అందుబాటులోకి జియో ఎయిర్‌ ఫైబర్.. ఫైబర్ vs ఎయిర్ ఫైబర్ మధ్య తేడాలివే!

వినాయకచవితి సందర్భంగా సెప్టెంబర్ 19 నుంచి రిలయన్స్ జియో టెలికాం కంపెనీ జియో ఎయిర్ ఫైబర్‌ను ప్రారంభించనుంది. ఈ విషయాన్ని రిలయన్స్ ఇండస్ట్రీస్ చైర్‌పర్సన్, మేనేజింగ్ డైరెక్టర్ ముఖేష్ అంబానీ కంపెనీ 2023 ఏజీఎమ్ సందర్భంగా ప్రకటించిన సంగతి తెలిసిందే. ఇది గృహాలు, కార్యాలయాల కోసం రూపొందించబడిన పోర్టబుల్ వైర్‌లెస్ ఇంటర్నెట్ సర్వీస్‌గా అంబానీ ఇప్పటికే తెలిపారు. ఈ జియో ఎయిర్ ఫైబర్ గరిష్టంగా 1.5 Gbps వరకు ఇంటర్నెట్ వేగాన్ని కల్గి ఉంటుంది. దీంతో వినియోగదారులకు సజావుగా, వేగంగా అధిక ఇంటర్నెట్‌ను ప్రసారం చేయడానికి వీలు కల్పిస్తుంది. వీడియో కాన్ఫరెన్స్‌లు, ఆన్‌లైన్ గేమ్స్ వంటి వాటిలో ఎలాంటి ఇబ్బందులు లేకుండా పాల్గొనవచ్చు. Jio AirFiber పిల్లలపై తల్లిదండ్రుల నియంత్రణలు, Wi-Fi 6కి మద్దతిస్తుంది. ఇంటిగ్రేటెడ్ సెక్యూరిటీ ఫైర్‌వాల్ వంటి లక్షణాలను కూడా కలిగి ఉంది. జియో ఎయిర్‌ఫైబర్ సేవలను మొదటగా గత సంవత్సరం కంపెనీ 45వ AGMలో ప్రవేశపెట్టారు.

జియో ఎయిర్‌ ఫైబర్ అంటే ఏమిటి?

Jio AirFiber అనేది Jio నుంచి వచ్చిన కొత్త వైర్‌లెస్ ఇంటర్నెట్ సర్వీస్. ఇది హై-స్పీడ్ ఇంటర్నెట్ కనెక్టివిటీని అందించడానికి 5G సాంకేతికతను ఉపయోగిస్తుంది. అలాగే సాంప్రదాయ ఫైబర్-ఆప్టిక్ కనెక్షన్‌లతో పోల్చదగిన వేగాన్ని అందిస్తుంది. వినియోగదారులు గరిష్టంగా 1 Gbps వేగంతో డేటాను పొందవచ్చు. JioAirfiber కాంపాక్ట్ మాత్రమే కాకుండా సెటప్ చేయడం కూడా సులభం అని కంపెనీ పేర్కొంది. వినియోగదారులు దీన్ని ప్లగ్ ఇన్ చేసి, ఆన్ చేస్తే సులభంగా వైఫై సహాయంతో ఈ సేవలను పొందవచ్చని జియో ప్రతినిధులు పేర్కొంటున్నారు.

జియో ఫైబర్ vs జియో ఎయిర్ ఫైబర్ మధ్య తేడాలు

టెక్నాలజీ: జియో ఫైబర్ దాని కవరేజ్ కోసం వైర్డు ఫైబర్ ఆప్టిక్ కేబుల్‌లను ఉపయోగిస్తుంది. అయితే Jio AirFiber పాయింట్-టు-పాయింట్ రేడియో లింక్‌లను ఉపయోగించి వైర్‌లెస్ విధానాన్ని తీసుకుంటుంది. అంటే జియో ఎయిర్‌ఫైబర్ గృహాలు, కార్యాలయాలను నేరుగా జియోకు వైర్‌లెస్ సిగ్నల్స్ ద్వారా అనుసంధానిస్తుంది. దీంతో ఫైబర్ కేబుల్స్ పరిమితుల నుంచి విముక్తి పొందుతుంది. బదులుగా ఇది జియో టవర్‌లతో లైన్-ఆఫ్-సైట్ కమ్యూనికేషన్‌పై ఆధారపడుతుంది.

వేగం: Jio AirFiber గరిష్టంగా 1.5 Gbps ఇంటర్నెట్ వేగాన్ని కల్గి ఉంటుంది. జియో ఫైబర్ 1 Gbps వేగాన్ని మాత్రమే కల్గి ఉంటుంది. దీంతో జియో ఫైబర్ కంటే జియో ఎయిర్ ఫైబర్ ఎక్కువ వేగాన్ని కల్గి ఉంటుంది. అయితే జియో ఎయిర్‌ఫైబర్ వాస్తవ వేగం సమీప టవర్‌కు ఉండే సామీప్యతను బట్టి మారవచ్చు.

కవరేజ్: జియో ఫైబర్ విస్తృత కవరేజీని అందిస్తున్నప్పటికీ, దేశవ్యాప్తంగా అందుబాటులో లేదు. కానీ JioAirFiber వైర్‌లెస్ సాంకేతికత భౌతిక మౌలిక సదుపాయాల ద్వారా పరిమితం కాకుండా విస్తృతమైన కవరేజీని అందించడానికి అనుమతిస్తుంది.

ఇన్‌స్టాలేషన్: Jio AirFiber ప్లగ్-అండ్-ప్లే చేయడానికి రూపొందించారు. దీంతో ఇది మరింత యూజర్ ఫ్రెండ్లీగా ఉండి కస్టమర్‌లకు అందుబాటులో ఉంటుంది. అయితే జియో ఫైబర్‌కు మాత్రం సాధారణంగా ప్రొఫెషనల్ ఇన్‌స్టాలేషన్ అవసరం.

ధర: జియో ఎయిర్‌ఫైబర్ సేవ పోటీ ధరతో అంచనా వేయబడుతుంది. దీని ధర దాదాపు రూ.6,000 వరకు ఉంటుందని అంచనా వేస్తున్నారు. దీనిపై సెప్టెంబర్ 19న స్పష్టత రానుంది. JioAirFiber బ్రాడ్‌బ్యాండ్ కనెక్షన్ కంటే కొంచెం ఖరీదైనది కావచ్చు. ఎందుకంటే ఇందులో పోర్టబుల్ డివైజ్ యూనిట్ ఉంటుంది. Jio AirFiber కేవలం హై-స్పీడ్ ఇంటర్నెట్ కంటే ఎక్కువ సేవలు అందిస్తుంది. ఇది తల్లిదండ్రుల నియంత్రణ సాధనాలు, Wi-Fi 6కి మద్దతు, Jio సెట్-టాప్ బాక్స్‌తో అనుసంధానం, నెట్‌వర్క్‌పై ఎక్కువ నియంత్రణను కూడా కలిగి ఉంటుంది.