Hyderabad: కేపీహెచ్‌బీలో ఓయో రూమ్లపై పోలీసుల మెరుపు దాడులు.. పోలీసులకు కనిపించిన దృశ్యాలివి..

హైదరాబాద్‌: కేపీహెచ్బీలోని (KPHB) పలు ఓయో రూమ్లపై (Oyo Rooms) బాలానగర్ ఎస్వోటీ పోలీసులు (Balanagar SOT Police) దాడులు చేశారు. 9 మంది యువతులను పోలీసులు రక్షించారు. కొన్ని రూమ్స్‌లో ప్యాకెట్ల కొద్దీ కండోమ్స్ కనిపించడం గమనార్హం. పబ్‌లు, లాడ్జీలపై (Pubs, Lodges) పోలీసుల నజర్‌ పెరడగంతో జల్సా రాయుళ్లు రూటు మార్చారు. నగర శివార్లలో ఉండే గెస్ట్‌, ఫాంహౌసులు, ఓయో రూములను అడ్డాగా మార్చుకొని పేకాట, హుక్కా, మద్యం సేవించడం, వ్యభిచారం వంటి అసాంఘిక కార్యకలాపాలు చేస్తున్నారు. ఈ విషయాన్ని గుర్తించిన సైబరాబాద్‌ ఎస్వోటీ పోలీసులు ఓయో రూములు, లాడ్జీలు, ఫామ్‌హౌసులు, పబ్‌లు, దాబాలపై మెరుపుదాడులు నిర్వహిస్తూ చెమటలు పట్టిస్తున్నారు.

సైబరాబాద్‌ ఎస్వోటీ పోలీసులు (Cyberabad SOT Police) గత శనివారం రాత్రి కూడా 8 ఓయో లాడ్జీలు, 11 ఫామ్‌హౌస్‌లు, 6 పబ్‌లు, 14 దాబాల్లో ఆకస్మిక తనిఖీలు చేశారు. అక్కడ అసాంఘిక కార్యకలాపాలకు పాల్పడుతున్న వారితో పాటు నిర్వాహకులను కూడా అరెస్ట్‌ చేశారు. పేట్‌ బషీరాబాద్‌లోని లక్ష్మీ విల్లా గెస్ట్‌హౌస్‌లో గంజాయి సేవిస్తున్న పలువురిని గుర్తించి వారితో పాటు నిర్వాహకులను అరెస్ట్‌ చేశారు.

కేపీహెచ్‌బీలోని హోటల్‌ కార్తికేయ రెసిడెన్సీలో వ్యభిచారం నిర్వహిస్తున్నట్లు గుర్తించి, ఓ యువతిని కాపాడి, కస్టమర్‌ను అరెస్ట్‌ చేశారు. షామీర్‌పేటలోని జాస్మిన్‌ ఫాంహౌస్‌లో గంజాయి సేవిస్తున్న వారిని గుర్తించి వారిపై కేసులు నమోదు చేశారు. అనుమతి లేకున్నా.. హుక్కా, మద్యం సేవించేందుకు అనుమతించిన శంషాబాద్‌లోని అక్రియేషన్‌ ఫామ్‌హౌస్‌ నిర్వాహకులపై కేసులు నమోదు చేసి, హుక్కా ఫ్లేవర్లు, మద్యం బాటిళ్లు స్వాధీనం చేసుకున్నారు. మొయినాబాద్‌లోని బ్రౌన్‌టౌన్‌ రిసార్ట్‌ మ్యాంగో వుడ్‌ ఫాంలో మహిళలతో ముజ్రా పార్టీ, మద్యం, హుక్కా సేవిస్తున్న పలువురిని అరెస్ట్‌ చేసి, ఫాం నిర్వాహకులపై కేసులు నమోదు చేశారు. ముజ్రా పార్టీలో 17 మంది యువకులు, నలుగురు యువతులను గుర్తించారు. వారి నుంచి కండోమ్‌లు, 100 గ్రాముల గంజాయి, గంజాయి నింపిన సిగరెట్లు, 11 హుక్కాపాట్‌లు, 10 హుక్కా పైపులు, హుక్కాఫ్లేవర్లు, సిల్వర్‌ పేపర్లు, మద్యం బాటిళ్లతోపాటు 7 కార్లు, 2 బైక్‌లు స్వాధీనం చేసుకున్నారు.