Road Accident: శంషాబాద్‌లో ఘోరం.. బైక్‌ను ఈడ్చుకెళ్లిన లారీ

హైదరాబాద్: శంషాబాద్ ఎయిర్‌పోర్టు పోలీస్‌స్టేషన్ పరిధిలో జరిగిన రోడ్డు ప్రమాదంలో ఒకరు మృతి చెందారు. సోమవారం తెల్లవారుజామున గగన్ పహడ్ వద్ద లారీని బైక్ ఢీకొనడంతో ఈ ప్రమాదం జరిగింది. ఈ ఘటనలో ఒకరు మృతి చెందగా.. మరొకరి పరిస్థితి విషమంగా ఉంది. శంషాబాద్ వైపు రోడ్డు మలుపు తీసుకుంటున్న లారీ సడన్గా రోడ్డుపైకి రావడంతో వెనుక నుంచి వచ్చిన బైక్ ఢీకొట్టింది. ఈ ఘటనలో ఓ యువకుడు అక్కడికక్కడే మృతి చెందాడు. బైక్‌పై ఉన్న వ్యక్తి లారీ వెనుక భాగంలో ఇరుక్కుపోవడంతో కొద్దిదూరం వరకు శవాన్ని ఈడ్చుకెళ్లింది. దీన్ని గుర్తించి లారీ డ్రైవర్ లారీని రోడ్డు మధ్యలో వదిలేసి పారిపోయారు. సమాచారం అందిన వెంటనే పోలీసులు అక్కడకు చేరుకుని మృతదేహాన్ని స్వాధీనం చేసుకున్నారు. గాయపడిన వ్యక్తిని స్థానిక ఆస్పత్రికి తరలించారు. కేసు నమోదు చేసి దర్యాప్తు చేపట్టారు.