BJP: భారీ కార్యక్రమానికి తెలంగాణ బీజేపీ శ్రీకారం

హైదరాబాద్: బీజేపీ (BJP) ఓ మహత్తర కార్యానికి శ్రీకారం చుట్టింది. ఒకే రోజు 35 లక్షల కుటుంబాలను కలవాలని బీజేపీ నిర్ణయించింది. ప్రధాని మోదీ 9 ఏళ్ల పాలనను పూర్తి చేసుకున్న నేపథ్యంలో భారీ కార్యక్రమానికి పూనుకున్నారు. ‘‘ఇంటింటికీ బీజేపీ’’ పేరుతో ఈనెల 22న ప్రజల వద్దకు కమలనాథులు వెళ్లనున్నారు. రేపు ఉదయం 7 నుంచి మధ్యాహ్నం ఒంటిగంట వరకు ‘‘ఇంటింటికీ బీజేపీ’’ పేరిట ప్రజలతో మమేకం కానున్నారు. పోలింగ్ బూత్ అధ్యక్షుడి మొదలు... రాష్ట్ర అధ్యక్షుడి వరకు ప్రజల్లోకి వెళ్లాలని నిర్ణయించారు. ఒక్కో బూత్ అధ్యక్షులు కనీసం వంద కుటుంబాలను కలిసేలా కార్యాచరణ రూపొందించారు. రాష్ట్రస్థాయి నేతలంతా తమ తమ నియోజకవర్గాల్లో ప్రజల వద్దకు వెళ్లనున్నారు. కరీంనగర్‌లోని చైతన్యపురి, విద్యానగర్ కాలనీల్లో బీజేపీ రాష్ట్ర అధ్యక్షులు బండి సంజయ్ (Telangana BJP Chief Bandi Sanjay) పర్యటించనున్నారు. స్వయంగా ఇంటింటికీ వెళ్లి మోదీ ప్రభుత్వ విజయాలు, ప్రజలకు జరిగిన మేలును వివరించనున్నారు. ఇంటింటికీ బీజేపీ కార్యక్రమంలో కేంద్రమంత్రి కిషన్ రెడ్డి (Union Minister Kishan Reddy), బీజేపీ ఎంపీలు, ముఖ్య నేతలు పాల్గొననున్నారు.