TC VARUN: అభివృద్ధిలో పవనకల్యాణ్‌ మార్క్‌ చూపుతాం

నాయకులు, కార్యకర్తల ఘన స్వాగతం

అనంతపురం ప్రెస్‌క్లబ్‌, నవంబరు 14 (ఆంధ్రజ్యోతి): ఉమ్మడి అనంత జిల్లా అభివృద్ధిలో క్రియాశీలక భూమిక పోషించే అహుడా సంస్థ అభివృద్ధిలో తమ అధినేత పవనకల్యాణ్‌ మార్క్‌ ఏంటో చూపుతామని అహుడా చైర్మన, జనసేన జిల్లా అధ్యక్షుడు టీసీ వరుణ్‌ అన్నారు. అహుడా చైర్మన హోదాలో నగరానికి వచ్చిన ఆయనకు కూటమి నేతలు ఘన స్వాగతం పలికారు. బాటలో సుంకులమ్మ దేవలయం వద్ద ప్రత్యేక పూజల అనంతరం నగరంలోని గుత్తి రోడ్డు సర్కిల్‌కు చేరుకున్న వరుణ్‌కు నాయకులు, కార్యకర్తలు భారీ గజమాలతో స్వాగతం పలికారు. పాతూరు, శ్రీకంఠం సర్కిల్‌, టవర్‌క్లాక్‌ వద్ద నాయకులు, కార్యకర్తలు అభిమానులు టపాసులు, పూలవర్షంతో ఆహ్వానించారు. టీసీ వరుణ్‌ మాట్లాడుతూ అహుడా సంస్థను అభివృద్ధిపథంలో నడిపించేందుకు కృషి చేస్తానన్నారు. జనసేన పార్టీని క్షేత్రస్థాయిలో మరింత బలోపేతంచేసి ప్రతి కార్యకర్తకు అండగా ఉంటానన్నారు. నగర అభివృద్ధి విషయంలో అందర్నీ సమన్వయం చేసుకొని ముందకెళ్తామన్నారు. కూటమి నేతల పరస్పర సహాయసహకారాలతో అభివృద్ధికి బాటలు వేస్తామని స్పష్టం చేశారు. అనంతరం నివాసానికి చేరుకున్న వరుణ్‌కు కుటుంబసభ్యులు స్వీట్లు తినిపించి ఆనందం పంచుకున్నారు.