టీడీపీ కడప నగర అధ్యక్షుడిపై దాడి

• కర్రలతో కొట్టిన ముగ్గురు యువకులు, తలకు తీవ్ర గాయాలు

కడప (క్రైం), అక్టోబరు 19 (ఆంధ్రజ్యోతి): కడప నగరం టీడీపీ అధ్యక్షుడు శివకొండారెడ్డిపై కొంత మంది గుర్తుతెలియని యువకులు కర్రలతో దాడిచేశారు. ఇంటి నుంచి శనివారం ఉదయం 6.30 గంటలకు సమీపంలో ఉన్న టీస్టాల్‌కు ఆయన స్కూటీపై వచ్చారు. అక్కడి నుంచి కూరగాయలు కొనేందుకు అప్సర సర్కిల్‌కు వెళ్లారు. కూరగాయలు తీసుకుని ఇంటికి వెళుతూ పాల కోసం దగ్గర్లోని మార్ట్‌ వద్ద ఆగేందుకు ప్రయత్నిస్తుండగా.. వెనకే ద్విచక్ర వాహనంపై వచ్చిన ముగ్గురు యువకులు కర్రలతో ఆయన తల, వీపు మీద దాడి చేశారు. గమనించిన స్థానికులు అక్కడికి రావడంతో కర్రలు అక్కడే పారేసి నిందితులు పారిపోయారు. సమాచారం అందుకున్న చిన్నచౌకు సీఐ తేజమూర్తి, ఎస్‌ఐలు రవికుమార్‌, రాజరాజేశ్వర్‌రెడ్డి సంఘటనాస్థలానికి చేరుకుని దాడి ఘటనపై ఆరా తీశారు. అక్కడ ఉన్న షాపుల్లో సీసీ ఫుటేజీలు పరిశీలించారు. నిందితుల కోసం పోలీసులు గాలింపు చర్యలు చేపట్టారు. దాడిలో గాయపడ్డ శివకొండారెడ్డిని చికిత్స నిమిత్తం రిమ్స్‌కు తరలించారు. బాధితుడి ఫిర్యాదు మేరకు పోలీసులు కేసు నమోదు చేసి దర్యాప్తు చేపట్టారు. రిమ్స్‌లో చికిత్స పొందుతున్న శివకొండారెడ్డిని కడప టీడీపీ నాయకులు పరామర్శించారు.