అమ్మవారికి బోనాలు

ఆత్మకూరు రూరల్‌, అక్టోబరు 10: మండలంలోని వెంకటాపురం గ్రామంలో వెలిసిన రాజరాజేశ్వరి అమ్మవారి ఆలయంలో దసరా మహోత్సవాల్లో భాగంగా ఎనిమిదో రోజు బుధవారం దుర్గాష్టమి సందర్బంగా అమ్మవారు దుర్గాదేవి అలంకరణలో భక్తులకు దర్శనమిచ్చారు. ప్రాతఃకాల సమయంలో ఆలయంలోని రాజరాజేశ్వరి మాతకు ఆలయ పురోహితులు సుందరరాజశర్మ ఆధ్వర్యంలో పంచామృతాలతో అభిషేకాలు నిర్వహించి, దుర్గాదేవిగా ప్రత్యేక అలంకరణ గావించి, విశేష పూజలు చేపట్టారు. అంతకు ముందు గ్రామంలో మహిళలు ఉపవాస దీక్షలతో అమ్మవారికి సమర్పించడానికి బోనాలతో గ్రామంలో ఊరేగింపుగా తరలివచ్చి, అమ్మవారికి బోనాలను సమర్పించారు. అనంతరం కలశపూజ, గణపతిపూజ, లక్ష్మి పూజ, పుణ్యహవచనం తదితర పూజలు నిర్వహించారు. మహిళలు అధిక సంఖ్యలో పాల్గొని కుంకుమార్చన పూజలు నిర్వహించారు. అలాగే కురుకుంద గ్రామంలో వెలసిన కురుకులాంబ అమ్మవారి ఆలయంలో దసరా నవరాత్రి వేడుకల్లో భాగంగా ప్రత్యేక పూజలు నిర్వహించారు. కరివేన గ్రామంలో అమ్మమ్మ ఆలయంలో దసరా నవరాత్రి వేడుకల్లో భాగంగా విశేష పూజలు నిర్వహించారు.