MP Raghurama: చంద్రబాబు, పవన్‌ల సహకారం మర్చిపోలేను

రాజమండ్రి: సంక్రాంతి పండుగ సందర్భంగా నరసాపురం ఎంపీ రఘురామ కృష్ణరాజు నేడు సొంత నియోజకవర్గం నరసాపురానికి వచ్చారు. ఈ సందర్భంగా రఘురామ మాట్లాడుతూ.. తాను జైలులో ఉన్నప్పుడు టీడీపీ, జనసేన నేతలు ప్రేమతో ఆదరించారన్నారు. టీడీపీ అధినేత చంద్రబాబు, జనసేన అధినేత పవన్ కళ్యాణ్, టీడీపీ జాతీయ ప్రధాన కార్యదర్శి నారా లోకేష్ ఇచ్చిన సహకారం మర్చిపోలేనని రఘురామ తెలిపారు.

తనను సొంత నియోజకవర్గానికి రాకుండా అధికార పార్టీ నేతలు ఎన్నో కుట్రలు చేశారన్నారు. నాన్నమ్మ చనిపోయినప్పుడు కూడా రాలేకపోయానని రఘురామ ఆవేదన వ్యక్తం చేశారు. ఆ సమయంలో చాలా భాధ అనిపించిందన్నారు. ఇప్పుడు కోర్టు రక్షణతో సొంతూరు వెళ్ళటం చాలా సంతోషంగా ఉందన్నారు. రాజమండ్రి ఎయిర్ పోర్టుకి వచ్చి ఇంతమంది ఘనస్వాగతం పలకటం చాలా సంతోషంగా ఉందన్నారు. తనను ఇబ్బందులకు గురిచేసి ప్రజల్లో మంచి ఆదరణ కల్పించిన జగన్ కు ధన్యవాదాలు తెలుపుకుంటున్నానని రఘురామ తెలిపారు.