Chandrababu Naidu: చంద్రబాబు ప్రమాణ స్వీకారానికి హాజరైన ప్రముఖులు వీరే!

టీడీపీ అధినేత చంద్రబాబు నాయుడు (Chanddrababu Naidu) ఏపీ ముఖ్యమంత్రిగా చేసిన ప్రమాణస్వీకార కార్యక్రమానికి అతిరథ మహారథులు హాజరయ్యారు. ప్రధానమంత్రి నరేంద్ర మోదీతో (Narendra Modi) పాటు కేంద్రమంత్రులైన అమిత్ షా, జేపీ నడ్డా, నితిన్ గడ్కరీ, బండి సంజయ్ కుమార్ ఈ కార్యక్రమానికి విచ్చేశారు. అంతేకాదు.. మహారాష్ట్ర సీఎం ఏక్‌నాథ్ షిండేతో సహా మాజీ ఉపరాష్ట్రపతి వెంకయ్య నాయుడు, మాజీ సీజేఐ జస్టిస్ ఎన్వీ రమణ, తెలంగాణ మాజీ గవర్నర్ తమిళిసై సౌందరాజన్, బీజేపీ ఎంపీ పురంధేశ్విరి తదితరులు వచ్చారు.

రాజకీయ ప్రముఖులే కాదు.. సినీ పరిశ్రమ నుంచి పలువురు నటీనటులు కూడా ఈ ప్రమాణస్వీకార మహోత్సవానికి తరలివచ్చారు. మెగాస్టార్ చిరంజీవి, సూపర్‌స్టార్ రజినీకాంత్‌తో పాటు మెగాపవర్ స్టార్ రామ్ చరణ్ కూడా ఈ వేడుకకు హాజరయ్యారు. హిందూపురం ఎమ్మెల్యే, సినీ నటుడు నందమూరి బాలకృష్ణ కూడా అతిథుల్ని ఆహ్వానిస్తూ.. వేదికపై ప్రత్యేక ఆకర్షణగా నిలిచారు. జనసేనాధినేత పవన్ కళ్యాణ్ (Pawan Kalyan) సతీమణి అన్నా లెజినోవా, ప్రముఖ నిర్మాత ఘట్టమనేని ఆదిశేషగిరి రావు, రజినీకాంత్ భార్య లత, హరికృష్ణ కుమార్తె సుహాసిని, నటుడు నందమూరి చైతన్య కృష్ణ తదితరులు ఈ వేడుకకి విచ్చేసి కళ్లారా వీక్షించారు.

కాగా.. చంద్రబాబు ముఖ్యమంత్రి, పవన్ కళ్యాణ్ మంత్రిగా ప్రమాణస్వీకారం చేసినప్పుడు ప్రాంగణం మొత్తం మార్మోగిపోయింది. ఈ వేడుకను చూసేందుకు తరలివచ్చిన జనం.. ఈలలు, కేకలు, చప్పట్లతో హోరెత్తించేశారు. ఇదే సమయంలో కొందరు భావోద్వేగానికి లోనయ్యారు. ఎన్నో సంవత్సరాల నుంచి వేచిచూస్తున్న ఈ అద్భుత ఘడియలు రానే వచ్చేయడం.. కళ్లారా వీక్షించడంతో.. ఇలా జనాలు ఎమోషనల్ అయ్యారు.

Read Latest Andhra Pradesh News and Telugu News