Abu Dhabi: అబుదాబిలో తొలి హిందూ దేవాలయం ప్రారంభించిన ప్రధాని మోదీ.. విశిష్టతలు తెలుసా?
ABN , Publish Date - Feb 14 , 2024 | 07:18 PM
అబుదాబిలో మొదటి హిందూ దేవాలయాన్ని ప్రధాన మంత్రి నరేంద్ర మోదీ బుధవారం ప్రారంభించారు. అయితే ఈ ఆలయం ప్రత్యేకతలు, విశిష్టతల గురించి ఇప్పుడు తెలుసుకుందాం.
దేశంలో రామ మందిర ప్రారంభోత్సవం తర్వాత ఈరోజు (ఫిబ్రవరి 14న) ప్రధాని నరేంద్ర మోదీ యునైటెడ్ అరబ్ ఎమిరేట్స్ (UAE) రాజధాని అబుదాబిలో మొదటి హిందూ దేవాలయాన్ని ప్రారంభించారు. దుబాయ్-అబుదాబి షేక్ జాయెద్ హైవేపై అల్ రహ్బా సమీపంలో నిర్మించిన ఈ ఆలయాన్ని బోచసన్వాసి శ్రీఅక్షర్ పురుషోత్తం స్వామినారాయణ్ సంస్థ (BAPS) హిందూ దేవాలయంగా పిలుస్తున్నారు. దీనిని దాదాపు 27 ఎకరాల విస్తీర్ణంలో నిర్మించారు. ఈ ఆలయ పనులు 2019 సంవత్సరం నుంచి మొదలయ్యాయి. ఇందుకోసం భూమిని యూఏఈ ప్రభుత్వం విరాళంగా ఇచ్చింది.
ఈ ఆలయం మార్చి 1 నుంచి ప్రజల కోసం తెరవబడుతుంది. ఈ కాంప్లెక్స్‌లో సందర్శకుల కేంద్రం, ప్రార్థనా మందిరాలు, ప్రదర్శనలు, అభ్యాస ప్రాంతాలు, క్రీడా ప్రాంతం ఉన్నాయి. పిల్లలు, యువత కోసం ఫుడ్ కోర్ట్, గిఫ్ట్ షాప్ సహా అనేక ఇతర సౌకర్యాలు ఉన్నాయి. అబుదాబిలో నిర్మించిన ఈ ఆలయాన్ని దాదాపు 700 కోట్ల రూపాయలతో BAPS సంస్థ ఆధ్వర్యంలో నిర్మించారు. BAPS అనేది ప్రపంచవ్యాప్తంగా 1,100 కంటే ఎక్కువ హిందూ దేవాలయాలను నిర్మించిన సంస్థగా ప్రసిద్ధి గాంచింది. ఈ ఆలయం కాశీ విశ్వనాథ్ కారిడార్ కంటే చాలా పెద్దది. ఈ ఆలయం నిర్మాణంలో భాగంగా రాజస్థాన్‌ జైపూర్‌లోని గులాబీ ఇసుక రాళ్లను ఉపయోగించారు. ఆలయ మధ్య భాగంలో స్వామి నారాయణుని విగ్రహాన్ని ప్రతిష్ఠించారు.
అయోధ్యలో ఆలయాన్ని నిర్మించినది కూడా ఇదే రాయి కావడం విశేషం. పాలరాతితో చేసిన ఆలయంలోని ప్రతి స్తంభంపై హనుమాన్ జీ, రామ్ జీ, సీతా జీ, గణేష్ జీ విగ్రహాలు చెక్కబడ్డాయి. ఆలయ బయటి స్తంభాలపై సీతా స్వయంవరం, రామ వనగమన్, కృష్ణ లీలలు మొదలైనవి ఉన్నాయి. భారతదేశం, యూఏఈ సంస్కృతుల సంగమం నేపథ్యంలో ఆలయంలో 7 మినార్లు నిర్మించబడ్డాయి. ఈ ఆలయంలో ఎక్కువ ఉష్ణోగ్రతను కొలవడం, భూకంపం వంటి విపత్తులను పర్యవేక్షించడానికి 300 కంటే ఎక్కువ గల హైటెక్ సెన్సార్లను వినియోగిస్తున్నారు. ఆలయ నిర్మాణంలో ఎటువంటి మెటల్ ఉపయోగించబడలేదు. పునాదిలో ఫ్లై యాష్ ఉపయోగించబడింది (బొగ్గు ఆధారిత విద్యుత్ ప్లాంట్ల నుంచి వచ్చే బూడిద).
