National : మోదీకి ఓటేయొద్దన్న ప్రభుత్వ టీచరు అరెస్టు

పట్నా, మే 19: ప్రధాని నరేంద్ర మోదీకి ఓటు వేయకూడదంటూ విద్యార్థులకు చెప్పిన ఓ ప్రభుత్వ ఉపాధ్యాయుడ్ని అరెస్టు చేసినట్టు బిహార్‌ రాష్ట్ర అధికారులు తెలిపారు. ముజఫర్‌నగర్‌ జిల్లా కుర్హానీ సమితి అమ్రఖ్‌లోని ప్రభుత్వ సెకండరీ పాఠశాలలో పనిచేస్తున్న హరేంద్ర రజక్‌పై ఈ చర్య తీసుకున్నట్టు చెప్పారు. ఉచిత రేషన్‌ పేరుతో మనుషులు తినడానికి పనికిరాని బియ్యం పంపిణీ చేస్తున్నందున మోదీకి ఓటు వేయడకూడదని ఆయన తరగతి గదిలో విద్యార్థులకు చెప్పారు. ఈ విషయాన్ని విద్యార్థులు తల్లిదండ్రులకు చెప్పడంతో వారు డీఈఓకు లిఖితపూర్వకంగా ఫిర్యాదు చేశారు. పభుత్వ ఉద్యోగి ఎవరూ ఎన్నికల ఫలితాలను ప్రభావితం చేసేలా వ్యవహరించకూడదని, ఆ టీచరు దీన్ని ఉల్లంఘించడంతో కేసు పెట్టి అరెస్టు చేసినట్టు పోలీసులు తెలిపారు.