Haj Travel 2024: హజ్ యాత్రకు టికెట్ ఎలా బుక్ చేసుకోవాలి? టైమింగ్స్‌ ఏంటి?. అక్కడికి ఎలా వెళ్లాలి?.. పూర్తి వివరాలు ఇవే

భారతదేశంలోని ముస్లింలకు గుడ్ న్యూస్ వచ్చేసింది. ఈసారి హజ్ యాత్ర కోసం భారత్, సౌదీ అరేబియా ద్వైపాక్షిక ఒప్పందంపై సంతకాలు చేశాయి. ఈ నేపథ్యంలో 2024లో ఈ యాత్ర కోసం భారత్ నుంచి 1,75,025 మంది వెళ్లనున్నారు. ఇప్పటికే రిజిస్ట్రేషన్ ప్రక్రియ ప్రారంభం కాగా ఈ సందర్భంగా యాత్రకు ఎలా వెళ్లాలి, బుకింగ్ ప్రక్రియ వంటి అంశాలను ఇప్పుడు తెలుసుకుందాం.

బుకింగ్ ప్రక్రియ:

హజ్ యాత్ర ప్రయాణంలో భాగంగా మొదట ఈ తీర్థయాత్రకు ఆరు నెలల ముందే బుకింగ్ ప్రక్రియ ప్రారంభమవుతుంది. అధికారిక తేదీలను సౌదీ అరేబియా ప్రభుత్వం ప్రకటిస్తుంది. కాబట్టి అప్‌డేట్‌ల కోసం అధికారిక www.hajcommittee.gov.in వెబ్‌సైట్‌ను ఎప్పటికప్పుడు ఫాలో కావాలి. అంతేకాదు హజ్ యాత్రకు చేరుకోవడానికి ట్రావెల్ ఏజెన్సీ ద్వారా లేదా స్వతంత్రంగా కూడా బుక్ చేసుకోవచ్చు. చాలా మంది ప్రజలు ట్రావెల్ ఏజెన్సీ ద్వారా బుకింగ్ చేసుకునేందుకు ఇష్టపడతారు. ఎందుకంటే ఇది అన్ని ఏర్పాట్లు, లాజిస్టిక్‌ సౌకర్యాలను చూసుకుంటుంది. సొంతంగా వైబ్‌సైట్ ద్వారా కూడా బుక్ చోసుకోవచ్చు.

సమయం:

ప్రతి సంవత్సరం హజ్ సమయం మారుతుంది. 2024లో జూన్ లేదా జులైలో హజ్ యాత్ర జరగవచ్చని అంచనా. అయితే నెలవంక కనిపించే సమయం ఆధారంగా ఈ తేదీలు మారవచ్చు. అయితే హజ్ యాత్ర తేదీ దగ్గరికొస్తున్న కొద్దీ రద్దీ ఎక్కువగా ఉండే అవకాశం ఉంది. ఈ క్రమంలో ముందే బుక్ చేసుకుంటే ఇబ్బందులుండవు.

ఎలా చేరుకోవాలి:

మక్కా సౌదీ అరేబియాలోని పశ్చిమ ప్రాంతంలో ఉంది. అంతర్జాతీయ ప్రయాణీకులకు ప్రధాన ద్వారం జెడ్డా కింగ్ అబ్దుల్ అజీజ్ అంతర్జాతీయ విమానాశ్రయం నిలయంగా ఉంటుంది. ఇది మక్కా నుంచి గంట ప్రయాణం. హజ్ సీజన్ సందర్భంగా యాత్రికుల రద్దీని దృష్టిలో ఉంచుకుని ప్రత్యేక విమానాలను కూడా ఏర్పాటు చేస్తారు. మీరు ట్రావెల్ ఏజెన్సీ ద్వారా బుక్ చేసుకుంటే వారు సాధారణంగా విమానాశ్రయం నుంచి మక్కాలోని మీ బసకు రవాణా కోసం ఏర్పాట్లు చేస్తారు. అయితే స్వతంత్రంగా ప్రయాణిస్తున్నట్లయితే మీరు విమానాశ్రయం నుంచి టాక్సీ లేదా బస్సులో ప్రయాణించవచ్చు.

వీసా అవసరాలు:

సౌదీయేతర పౌరులందరికీ హజ్ కోసం మక్కాలో ప్రవేశించడానికి వీసా అవసరం. మీ దేశాన్ని బట్టి వీసా ప్రక్రియ భిన్నంగా ఉంటుంది. చివరి నిమిషంలో ఎలాంటి సమస్యలు తలెత్తకుండా ఉండేందుకు వీసా దరఖాస్తు ప్రక్రియను ముందుగానే ప్రారంభించడం చాలా ముఖ్యం. వీసాతో పాటు, యాత్రికులు చెల్లుబాటు అయ్యే పాస్‌పోర్ట్, కొన్ని వ్యాధులకు సంబంధించిన టీకా రుజువు, సౌదీ ప్రభుత్వం జారీ చేసిన చెల్లుబాటు అయ్యే హజ్ పర్మిట్ కూడా కలిగి ఉండాలి. మీ ప్రయాణాన్ని ప్రారంభించే ముందు ఈ పత్రాలన్నింటినీ తప్పనిసరిగా ఉంచుకోవాలి.

వసతి:

హజ్ సీజన్‌లో మక్కాలో వివిధ రకాల వసతి అందుబాటులో ఉన్నాయి. హోటళ్లు, అపార్ట్‌మెంట్లు, టెంట్లు కూడా ఉంటాయి. అత్యంత సాధారణ, సరసమైన ఎంపిక మినా, అరాఫత్‌లోని టెంట్లలో ఉండడం. ఇవి ప్రాథమిక సౌకర్యాలతో అమర్చబడి ఉంటాయి.వీటిని సౌదీ ప్రభుత్వం నిర్వహిస్తుంది. మరింత సౌకర్యవంతమైన వసతి కోసం చుట్టుపక్కల అనేక హోటళ్ళు, అపార్ట్‌మెంట్లు అందుబాటులో ఉన్నాయి.