PM Narendra Modi: నరాలు తెగిపోతాయంటూ.. ప్రధాని మోదీకి, సీఎం యోగికి హత్యా బెదిరింపులు

అప్పుడప్పుడు కొందరు వ్యక్తులు విచక్షణ కోల్పోయి నోటికొచ్చింది మాట్లాడేస్తుంటారు. తాము చేస్తోంది తప్పా? ఒప్పో? అనేది పట్టించుకోకుండా హద్దుమీరి ప్రవర్తిస్తుంటారు. ఆ తర్వాత తగిన మూల్యం చెల్లించుకుంటారు. ఇప్పుడు కర్ణాటకకు చెందిన ఓ వ్యక్తిది కూడా ఇదే పరిస్థితి. ప్రధానమంత్రి నరేంద్ర మోదీతో (PM Narendra Modi) పాటు ఉత్తరప్రదేశ్ సీఎం యోగి ఆదిత్యనాథ్‌లను (CM Yogi Adityanath) చంపేస్తానని అతడు బెదిరింపులకు పాల్పడ్డాడు. దీంతో పోలీసులు రంగంలోకి దిగి అతడ్ని అరెస్టు చేశారు.

అరెస్టైన వ్యక్తి కర్ణాటకకు చెందిన వాడని.. అతని పేరు మహమ్మద్ రసూల్ కద్దారే (Mohammed Rasool Kaddare) అని యాద్గిర్ జిల్లా ఎస్పీ జీ. సంగీత (G Sangeeta) తెలిపారు. షోరాపూర్ తాలూకాలోని రంగంపేటకు చెందిన రసూల్.. హైదరాబాద్‌లో కూలీ పని చేస్తుంటాడని చెప్పారు. అతడ్ని తాము హైదరాబాద్‌లోనే అరెస్టు చేశామని వెల్లడించారు. ప్రస్తుతం ఈ కేసు దర్యాప్తులో ఉందని, కాబట్టి పూర్తి వివరాలు వెల్లడించలేమని చెప్పారు. కాగా.. నిందితునిపై ఐపీసీ 505 (1) (బి), 25 (1) (బి) సెక్షన్లు, ఆయుధాల చట్టం కింద కేసు నమోదు చేసినట్లు షోరాపూర్ పోలీసులు తెలిపారు.

ఇదిలావుండగా.. తన ఫేస్‌బుక్ వాల్‌లో పోస్ట్ చేసిన వీడియోలో కద్దారే ప్రధాని మోదీపై అనుచిత వ్యాఖ్యలు చేశాడు. అటల్ బిహారీ వాజ్‌పేయిలాగా (Atal Bihari Vajpayee) మోదీ మంచి పాలన అందించడం లేదని, ఆయన కేవలం టీ మాత్రమే అమ్ముతున్నారని ఎద్దేవా చేశాడు. బీజేపీ లేకుండా మీరు ఒంటరిగా వస్తే.. తలపడేందుకు తాను సిద్ధంగా ఉన్నానని మోదీకి సవాల్ విసిరాడు. కాంగ్రెస్ అధికారంలోకి వస్తే నరాలు తెగిపోతాయని, కాంగ్రెస్ జిందాబాద్ అని చెప్పుకొచ్చాడు. అంతేకాదు.. ప్రధాని మోదీతో పాటు సీఎం యోగిపై కూడా అభ్యంతరకర పదాల్ని వాడాడు.

మరిన్ని జాతీయ వార్తల కోసం ఇక్కడ క్లిక్ చేయండి