Narendra Modi: ఖేలో ఇండియా యూనివర్సిటీ గేమ్స్‌ షురూ..ఆ రాష్ట్రాలను అష్టలక్ష్మిగా అభివర్ణించిన మోదీ

అసోం(assam)లోని గౌహతిలో ఈరోజు(ఫిబ్రవరి 19న) ఖేలో ఇండియా యూనివర్సిటీ గేమ్స్‌(khelo india University games)ను కేంద్ర యువజన వ్యవహారాలు, క్రీడల శాఖ మంత్రి అనురాగ్ సింగ్ ఠాకూర్(anurag singh thakur) ప్రారంభించారు. ఈశాన్య ప్రాంతంలోని ఏడు రాష్ట్రాల‌లో 11 రోజుల పాటు జరగనున్న ఈ క్రీడల్లో 4500 మంది అథ్లెట్లు పాల్గొంటున్నారు. ఈ సందర్భంగా ప్రధానమంత్రి నరేంద్ర మోదీ ఈ క్రీడల్లో పాల్గొనేవారిని ఉద్దేశించి వీడియో ద్వారా ప్రసంగించారు. ఖేలో ఇండియా యూనివర్శిటీ గేమ్స్ మస్కట్ సీతాకోకచిలుక అష్టలక్ష్మిని సూచిస్తుందని ప్రధాని మోదీ(narendra modi) అన్నారు. ఆడండి, నిర్భయంగా ఆడండి, మీ కోసం, మీ జట్టు కోసం గెలవండి. మీరు ఓడిపోయినా చింతించకండి. ప్రతి ఎదురుదెబ్బ నేర్చుకునే అవకాశం అని ప్రధాన మంత్రి తెలిపారు.

విద్యాపరమైన విజయాలు జరుపుకున్నట్లే క్రీడలలో రాణించిన వారిని గౌరవించే సంప్రదాయాన్ని మనం పెంపొందించుకోవాలని మోదీ పేర్కొన్నారు. అలా చేయడం మనం ఈశాన్య ప్రాంతం నుంచి అలవార్చుకోవాలని సూచించారు. అది ఖేలో ఇండియా(khelo india) అయినా, టాప్స్ అయినా లేదా ఇతర కార్యక్రమాలు అయినా, మన యువ తరానికి కొత్త అవకాశాలను సృష్టించబడుతాయని చెప్పారు.

క్రీడాకారులు తలుచుకుంటే ఏదైనా సాధించగలరని ఈ సందర్భంగా మోదీ గుర్తు చేశారు. ఈ క్రమంలో అథ్లెట్లకు శుభాకాంక్షలను తెలియజేస్తూ గౌహతిలో ‘ఏక్ భారత్ శ్రేష్ఠ భారత్’ గొప్ప చిత్రాన్ని రూపొందించినందుకు ప్రధాని వారిని అభినందించారు. అసోం ప్రభుత్వంతో సహా వివిధ రాష్ట్ర ప్రభుత్వాలు క్రీడలను ప్రోత్సహించేందుకు, యువతకు తమ ప్రతిభను ప్రదర్శించేందుకు చేస్తున్న కృషిని ఆయన ప్రశంసించారు.

వాస్తవానికి ఈ క్రీడా పోటీలు గౌహతి(guwahati)తో సహా ఈశాన్య ప్రాంతంలోని ఆరు నగరాల్లో నిర్వహించబడతున్నాయి. 20 క్రీడా విభాగాల్లో మొత్తం 262 స్వర్ణాలు, 263 రజతాలు, 297 కాంస్య పతకాలు సాధించేందుకు ఈ పోటీలు నిర్వహిస్తున్నారు. గౌహతిలో అథ్లెటిక్స్, రగ్బీ, బాస్కెట్‌బాల్, వాలీబాల్, స్విమ్మింగ్, బ్యాడ్మింటన్, హాకీ, ఫెన్సింగ్, కబడ్డీ, మహిళల ఫుట్‌బాల్, టెన్నిస్, మల్లఖంబా, జూడో, టేబుల్ టెన్నిస్ వంటి 16 విభాగాలు ఉన్నాయి.