లక్నో: ఉత్తర్ ప్రదేశ్ వీధుల్లో మరోసారి మహిళలు హింసాత్మకంగా మారారు. కన్న మిన్ను మరిచి సాటి మహిళలని కూడా చూడకుండా ఒకరిపై ఒకరు కర్రలతో దాడి చేసుకున్నారు. నడి రోడ్డుపై పడేసి కాళ్లతో తంతూ కర్రలతో వారిపై విచక్షణారహితంగా దాడికి దిగారు. ఇందుకు సంబంధించిన వీడియో సోషల్ మీడియాలో వైరలవుతోంది.

2021లో ఉత్తరప్రదేశ్‌లోని బాగ్‌పట్ వీధుల్లో చాట్ విక్రేతలు రెండు సమూహాలుగా మారి ఘర్షణలకు దిగారు. ఆ వీడియో సైతం నెట్టింట వైరల్ కాగా దానిని నెటిజన్లు ఇది మరో భాగ్ పట్ యుద్ధం లా ఉంది అంటూ వైరల్ చేశారు. దీనిపై రకరకాల మీమ్స్ ఇప్పటికే షేర్ చేస్తుంటారు. తాజాగా మరోసారి ఇదే ఘటన రిపీట్ అయ్యింది.

యాక్షన్ సన్నివేశాన్ని తలపించేలా వీధుల్లో ఒకరినొకరు తన్నుకున్నారు. దీన్నంతా ఓ బాల్కనీలోంచి వీడియో తీయడంతో ఈ దారుణం వెలుగులోకి వచ్చింది. ఫుటేజీలో ఇద్దరు మహిళలు మరొక మహిళను కర్రలతో నిర్దాక్షిణ్యంగా కొట్టడం ఆశ్చర్యానికి గురిచేస్తోంది. ఇంతలో మరికొంత మంది అక్కడ గుమిగూడి దొరికిన వారిని దొరికినట్టు చితకబాదారు. కొందరైతే యుద్ధానికి సిద్ధమైన యోధుల్లా తమ చున్నీలను నుదుటికి కట్టుకున్నారు. మధ్యలో వచ్చిన ఓ చిన్న బాలుడిని కూడా గాయపరిచినట్టు తెలుస్తోంది. దారిన పోయేవారు నచ్చజెప్తున్నా వారిని బెదిరించి అక్కడినుంచి పంపించేస్తున్నట్టు వీడియోలో చూడొచ్చు. అసలు ఇంతలా దాడి చేసుకోవడానికి గల కారణాలు స్పష్టంగా తెలియనప్పటికీ.. ఎరుపు, గులాబీ రంగు బట్టలు వేసుకున్న మహిళల మధ్య గొడవ మొదలైనట్టు తెలుస్తోంది.

Sea Plane: తొలిసారిగా విజయవాడ నుంచి శ్రీశైలం వరకు సీప్లెయిన్