మరోసారి జంటగా... కథ కలిపింది కనువిందుగా

ఎప్పుడో ఇరవై, ముప్పై ఏళ్ల క్రితం వెండితెరపై జంటగా మెప్పించిన హీరోలు, హీరోయిన్లు వాళ్లంతా. చక్కని ప్రేమకథా చిత్రాలతో ఒకప్పుడు హిట్‌ ఫెయిర్‌గా బాక్సాఫీసు దగ్గర కాసుల వర్షం కురిపించిన కాంబినేషన్‌ వారిది. ఇప్పుడు మళ్లీ దశాబ్దాల తర్వాత మళ్లీ జంటగా ప్రేక్షకుల ముందుకు రాబోతున్నారు. వయసుకు తగ్గ పాత్రలతో అలరించేందుకు మంచి కథ కుదిరింది, ఇక కనువిందే మిగిలింది అంటూ ప్రేక్షకుల ముందకు వచ్చేందుకు సిద్ధమవుతున్నారు. మరోసారి జంటగా నటిస్తున్నారు అంటే ఆ హీరో హీరోయిన్ల కాంబినేషన్‌మీద ప్రేక్షకుల్లో ఆసక్తి పెరుగుతుంది. ఒకప్పుడు మెరిసిన సీనియర్‌ జంటలు సైతం ఇప్పుడు బాలీవుడ్‌ తెరపై సందడి చేస్తున్నాయి. సీనియర్‌ హీరోలకు జోడీగా సీనియర్‌ భామలు ఆడిపాడుతున్నారు.

బాలీవుడ్‌లో మరో సీనియర్‌ సంజయ్‌దత్‌తో రవీనాటాండన్‌ జంటగా నటించిన పలు చిత్రాలు బాక్సాఫీసు దగ్గర సందడి చేశాయి. ‘జంగ్‌, ఆతిష్‌, విజేత, జీనా మర్నా తేరే సంగ్‌, క్షత్రియ’ తదితర చిత్రాల్లో కలసి నటించగా కొన్ని చిత్రాలు మంచి విజయాన్ని అందుకున్నాయి. సుదీర్ఘ విరామం తర్వాత వీరిద్దరూ కలసి నటించిన చిత్రం ‘ఘడ్‌చఢీ’. 90ల నాటి ప్రేమకథతో ఈ చిత్రం తెరకెక్కింది. ఈ రొమాంటిక్‌ కామెడీ ఎంటర్‌టైనర్‌ ఈ ఏడాది ఆగస్టులో ప్రముఖ ఓటీటీలో విడుదలవ్వగా సంజయ్‌, రవీనా జంట ప్రేక్షకులను మెప్పించింది.

రెండు తరాల ప్రేమకథలోఈ మధ్యన వరుస అపజయాలతో అక్షయ్‌కుమార్‌ జోరు కొంచెం తగ్గింది. కానీ ఆయన చేతిలో మాత్రం ఎప్పుడూ నాలుగైదు సినిమాలు ఉంటున్నాయి. అలాగే అందం అభినయంతో బాలీవుడ్‌లో కథానాయికగా తనకంటూ ప్రత్యేక స్థానాన్ని సంపాదించుకున్నారు రవీనా టాండన్‌. వీరిద్దరి జంట బాలీవుడ్‌లో హిట్‌ ఫెయిర్‌గా పేరు తెచ్చుకుంది. తొలిసారి వీరిద్దరూ జంటగా ‘మొహ్రా’ చిత్రంలో నటించారు. ఆ తర్వాత ‘ఖిలాడియోంకా ఖిలాడి, కీమత్‌, దావా, బరూద్‌, పోలీస్‌ ఫోర్స్‌’ చిత్రాల్లో కలసి కనిపించారు. తెరపైనే కాదు నిజజీవితంలోనూ ప్రేమలో పడ్డ ఈ జంట నిశ్చితార్థం చేసుకున్నాక విడిపోయింది. ఆ తర్వాత వీరిద్దరూ కలసి సినిమాలు చేయలేదు. ఇప్పుడు ఇరవై ఏళ్ల తర్వాత వీరిద్దరూ కలసి నటించిన ‘వెల్క్‌మ్‌ టూది జంగిల్‌’ చిత్రం ఈ ఏడాది క్రిస్మస్‌కు ప్రేక్షకుల ముందుకు రాబోతోంది. భారీ తారాగణంతో తెరకెక్కిన ఈ చిత్రంలో రవీనా, అక్షయ్‌ జంట మరోసారి అభిమానులను అలరించనుంది. అలాగే అక్షయ్‌ కథానాయకుడిగా తెరకెక్కుతోన్న ‘జాలీ ఎల్‌ఎల్‌బీ’లోనూ రవీనా కనిపించనున్నారు. అయితే ఈ చిత్రంలో ఆమె సునీల్‌శెట్టి భార్య పాత్రలో కనిపించనున్నారు.

• గదర్‌ మేజిక్‌

2003లో వచ్చిన ‘ది హీరో’ చిత్రంతో తొలిసారి జంటగా కనిపించారు సన్నీడియోల్‌, ప్రీతీ జింటా. ఈ మధ్యలో వీరిద్దరి కలయికలో ‘హీరోస్‌, భయ్యాజీ సూపర్‌హిట్‌’ చిత్రాలు వచ్చాయి. ఇప్పుడు మరోసారి వీరిద్దరి కాంబినేషన్‌ కుదిరింది. ‘లాహోర్‌ 1947’ చిత్రంలో సొట్టబుగ్గల సుందరి ప్రీతీ జింటాతో కలసి సందడి చేయనున్నారు సన్నీడియోల్‌. ఆమిర్‌ఖాన్‌ ఈ చిత్రాన్ని నిర్మిస్తున్నారు. దేశ విభజన నేపథ్యంలో సాగే కథ ఇది. వచ్చే ఏడాది గణతంత్ర దినోత్సవం సందర్భంగా ఈ చిత్రం ప్రేక్షకుల ముందుకు రానుంది. సంచలన వసూళ్లతో బాలీవుడ్‌ చరిత్రలో నిలిచిపోయిన చిత్రం ‘గదర్‌’. సన్నీడియోల్‌, అమీషా పటేల్‌ జంటగా నటించారు. ఆ చిత్రానికి కొనసాగింపుగా రెండు దశాబ్దాల తర్వాత వచ్చిన ‘గదర్‌ 2’ చిత్రంలోనూ సన్నీడియోల్‌, ఆమిషా పటేల్‌ జంట కనువిందు చేసింది. తొలిభాగానికి లభించిన స్థాయిలోనే రెండో భాగానికి సైతం వసూళ్లు దక్కడం విశేషం.

• సింగం శ్రీమతిగా

అజయ్‌దేవ్‌గణ్‌, కరీనా కపూర్‌ తొలిసారి 2006లో వచ్చిన ‘ఓంకార’ చిత్రంలో జంటగా నటించారు. ఆ తర్వాత వారి కాంబినేషన్‌లో ‘యువ, గోల్‌మాల్‌ రిటర్న్స్‌, గోల్‌మాల్‌ 3, సత్యాగ్రహ’ చిత్రాలు వచ్చాయి. ఆ అవన్నీ దాదాపు బాక్సాఫీసు దగ్గర మంచి విజయాలను అందుకున్నాయి. ఇప్పుడు ‘సింగం ఎగైన్‌’ చిత్రంతో దీపావళికి ఈ జంట మరోసారి ప్రేక్షకుల ముందుకు వచ్చింది. 2014లో వచ్చిన ‘సింగం రిటర్న్స్‌’ చిత్రంలో అజయ్‌ భార్య పాత్రలో కరీనా కనిపించగా ఇప్పుడడు ‘సింగం ఎగైన్‌’లోనూ ఆమె అదే పాత్రను పోషించారు.

‘తలాష్‌, త్రీ ఇడియట్స్‌’ చిత్రాల్లో జంటగా కనిపించారు ఆమిర్‌ఖాన్‌, కరీనాకపూర్‌. ఆ తర్వాత ‘బాంబే టాకీస్‌’ చిత్రంలో ఓ పాటలో వీరిద్దరూ అతిథి పాత్రల్లో కనిపించారు. కొన్నేళ్ల గ్యాప్‌ తర్వాత వీరిద్దరూ కలసి నటించిన ‘లాల్‌సింగ్‌ చద్దా’ 2022లో విడుదలైంది. బాక్సాఫీసు దగ్గర నిరాశపరిచినా కానీ ఈ జంటకు మాత్రం మంచి మార్కులే పడ్డాయి.

• ఇక టబు, అజయ్‌ దేవ్‌గణ్‌ జంట గురించి ప్రత్యేక పరిచయం అక్కర్లేదు. వారిది బాలీవుడ్‌లో హిట్‌ ఫెయిర్‌. వారిద్దరి కలయికలో తొమ్మిది సినిమాలు రాగా వాటిలో విజయాల శాతం ఎక్కువే. ‘దృశ్యం, గోల్‌మాల్‌ అగైన్‌, విజయ్‌పథ్‌, హకీకత్‌, దేదే ప్యార్‌దే’ తదితర చిత్రాల్లో నటించారు. వీరిద్దరి కలయికలో తెరకెక్కిన ‘ఆరోమే కహాన్‌ దమ్‌ థా’ చిత్రం ఇటీవలే విడుదలైంది.