శ్రీ జ్ఞాన సరస్వతి ఆలయంలో సామూహిక అక్షరాభ్యాసాలు

విజయనగరం జిల్లా: అమ్మనాన్నల తోడుగా చిన్నారులు చదువుల బాటలో తొలి అడుగులు వేశారు. అక్షర జ్ఞానానికి నాంది పలికారు. చదువుల తల్లి శ్రీ జ్ఞాన సరస్వతిదేవి చెంత ఈ తంతును సందడిగా ముగించారు. విజయనగరంలోని రింగురోడ్డులో ఉన్న జ్ఞాన సరస్వతి ఆలయంలో సామూహిక అక్షరాభ్యాసాలు వైభవంగా జరిగాయి. ఉదయం నుంచి అమ్మవారికి ప్రత్యేక పూజలు నిర్వహించారు. అనంతరం బృందాల వారీగా వందలాది మంది చిన్నారులు అక్షరాలు దిద్దారు. పొరుగున ఉన్న ఒడిశా, ఛత్తీస్‌ఘడ్‌ రాష్ట్రాలతో పాటు ఆంధ్రా, తెలంగాణలోని వివిధ ప్రాంతాల నుంచి తల్లిదండ్రులు పిల్లలను తోడ్కొని వచ్చారు.