డ్రోన్‌ భళా.. విన్యాసాలు అదుర్స్‌..

విజయవాడ: అమరావతి డ్రోన్‌ షో రికార్డులు బద్దలు కొట్టింది. సరికొత్త ప్రపంచ రికార్డులను నమోదు చేసింది. మొత్తం ఐదు విభాగాలలో గిన్నిస్‌ రికార్డులను నెలకొల్పింది. డ్రోన్‌ షోను వీక్షించటం కోసం వచ్చిన జనంతో కృష్ణానదీ తీరం పులకించింది. ప్రధాన వేదిక పున్నమిఘాట్‌ కిక్కిరిసింది. రాత్రి 8.30 గంటలకు డ్రోన్‌షో మొదలైంది. ఒక్కసారిగా ఆకాశంలో నక్షత్రాలుగా 5,500 డ్రోన్లు పైకి లేచాయి. ఆకాశంలో వేలాది నక్షత్రాలుగా కనిపించిన డ్రోన్లు.. ఆ తర్వాత కంప్యూటర్‌ ప్రోగ్రామింగ్‌ను డ్రోన్‌ సెన్సార్లు స్వీకరించి అత్యద్భుత ప్రదర్శన చేశాయి. విజయవాడలోని పున్నమి ఘాట్‌లో ఏర్పాటు చేసిన డ్రోన్ షో కార్యక్రమంలో ముఖ్యమంత్రి నారా చంద్రబాబు నాయుడు, కేంద్ర పౌర విమానయాన శాఖ మంత్రి కింజరాపు రామ్మోహన్ నాయుడు, రాష్ట్ర మంత్రులు, ఎమ్మెల్యేలు, తదితరులు పాల్గొన్నారు.