Viral: డబ్బున్నోడివైనా నీది ఎంత మంచి మనసు బ్రో! నెటిజన్లను కట్టిపడేస్తున్న వీడియో!
ABN , Publish Date - Aug 10 , 2024 | 10:25 PM
తన లగ్జరీ కారు నిలబడి ఫొటో దిగుతున్న ఓ పేద దివ్యాంగుడికి వాహన ఓనర్ ఊహించని సర్‌ప్రైజ్ ఇచ్చాడు. ఇందుకు సంబంధించిన వీడియో నెట్టింట వైరల్‌గా మారింది. జనాలన్ని కదిలిస్తోంది.
ఇంటర్నెట్ డెస్క్: కలిమిలేములతో సంబంధం లేకుండా సాటి మనిషిని మనిషిగా గౌరవిస్తే యావత్ ప్రపంచం స్వర్గంగా మారిపోతుంది. నెట్టింట ఓ వైరల్ వీడియోను (Viral) చూసి జనాలు ప్రస్తుతం ఇదే కామెంట్ చేస్తున్నారు. ఓ సంపన్న యువకుడి మంచి మనసే ఇందుకు కారణం. అతడి తీరు చూసి మురిసిపోతున్న జనాలు ప్రశంసల వర్షం కురిపిస్తున్నారు.
Viral: సొంత ఇల్లు బెటరా? అద్దె ఇల్లు బెటరా? డిబేట్‌పై నెటిజన్ల నిర్ణయం ఇదే!
వీడియోలో కనిపించిన దాని ప్రకారం, సంపన్న యువకుడు ఒకరు తన ఖరీదైన పోర్షే లగ్జరీ కారును రోడ్డు పక్కన నిలిపి ఏదో పనిమీద వెళ్లాడు. అతడు తిరిగొచ్చే సరికి ఓ దివ్యాంగుడు అతడి కారు పక్కన నిలబడి సెల్ఫీ కోసం ప్రయత్నించాడు. ఇంతలో సంపన్న యువకుడు రావడం చూసి అతడు క్షణకాలం తుళ్లిపడ్డాడు. అతడి కారును ఆనుకుని నిలబడ్డందుకు తిడతాడనే భయంతో కారు నుంచి దూరం జరిగే ప్రయత్నం చేశాడు. అతడి నిష్కల్మషమైన మనసు చూసి సంపన్న యువకుడి మనసు కరిగిపోయింది. దీంతో, అతడు దివ్యాంగుడికి ఊహించని సర్‌ప్రైజ్ ఇచ్చాడు (Differently-abled man clicks a selfie in front of Porsche what the owner does will bring tears to eyes).
తొలుత అతడు దివ్యాంగుడిని తన కారు వద్ద రకరకాల పోజుల్లో నిలబెట్టి ఫొటోలు తీశాడు. ఆ తరువాత అతడిని కారులో కూర్చోపెట్టుకుని ఓ చిన్న ట్రిప్ వేశాడు. ఖరీదైన లగ్జరీ కారులో ప్రయాణించడం తొలిసారి కావడంతో ఆ దివ్యాంగుడు ఉబ్బితబ్బిబ్బైపోయారు. సంపన్న యువకుడి సర్‌ప్రైజ్‌తో అతడి ముఖం సంతోషంతో వెలిగిపోయింది.
వీడియోలో ఇదంతా చూసిన నెటిజన్లు కూడా సంపన్న యువకుడిపై ప్రశంసల వర్షం కురిపించారు. అంత డబ్బున్నా కూడా యువకుడికి కొంచెం కూడా గర్వం లేదంటూ కొనియాడారు. ఇలాంటి మంచి పనులతో ప్రపంచంలో సుఖ సౌఖ్యాలు వెల్లివిరుస్తాయని, భూతలం స్వర్గంగా మారిపోతుందని కామెంట్ చేశారు. ఇలా రకరకాల కామెంట్స్ మధ్య వీడియో ప్రస్తుతం ట్రెండింగ్‌లో కొనసాగుతోంది.
